Aba Gibeoni Abanyabwengye
Ekitebyo 48
Aba Gibeoni Abanyabwengye
ENDEMBO nyingi omuri Kanaani hati zeteekateekire kurwanisa Abaisraeli. Nibateekateeka ngu nibabaasa kusingura. Kwonka abantu b’omu rurembo rwa Gibeoni orubahereire tikwo barikuteekateeka. Nibaikiriza ngu Ruhanga naahwera Abaisraeli, n’ahabw’ekyo tibarikwenda kurwanisa Ruhanga. Mbwenu noomanya eki aba Gibeoni bacwamu kukora?
Bacwamu kwehindura nk’abarikutuura hare munonga. Batyo bamwe aha bashaija bajwara obucancabari hamwe n’enkaito ezikuzire. Beekoreza endogoya zaabo ebiguniya bicwanyagurikire, kandi batwara n’entanda y’emigaati eyomire kandi ehumbire. Baimuka, baija ahari Yoshua, kandi bamugira bati: ‘Nituruga omu nsi ya hare, ahabw’okuba tukahurira ebirikukwata aha kurangaanwa kwa Ruhanga waanyu, Yehova. Tukahurira byona ebi yaabakoreire omuri Misri. N’ahabw’ekyo abakuru baitu bakatugambira ngu tutware entanda ahabw’orugyendo kandi twije tubagire tuti: “Turi abairu baanyu. Muturaganise endagaano ngu timuriturwanisa.” Nimureeba ku ebijwaro byaitu bikuzire ahabw’orugyendo rwa hare kandi n’emigaati ku eyomire kandi ku ehumbire.’
Yoshua n’abandi bakuru baikiriza aba Gibeoni. Batyo bakora nabo endagaano ku batarikwija kubarwanisa. Kwonka bwanyima y’ebiro bishatu, bahurira ku aba Gibeoni buzima bari abantu b’omwo haihi.
‘Ahabw’enki mutubeihire nimugira ngu murugire hare?’ Yoshua ababuuza.
Aba Gibeoni bagarukamu bati: ‘Tukozire tutyo ahabw’okuba tukagambirwa ngu Ruhanga waanyu Yehova akaraganisa kubaha ensi egi yoona eya Kanaani. N’ahabw’ekyo, tukatiinira kimwe ngu nimwija kutwita.’ Kwonka Abaisraeli baarinda endagaano yaabo kandi tibaita aba Gibeoni. Kureka baabahindura abahuuku baabo.
Omugabe wa Yerusaalemu aitwa ekiniga kingi ahabw’okuba aba Gibeoni bakozire endagaano y’obusingye na Abaisraeli. N’ahabw’ekyo agambira abandi bagabe bana ati: ‘Mwije munyambe okurwanisa Gibeoni.’ Kandi ekyo nikyo aba bagabe bataano baakozire. Noogira ngu aba Gibeoni bakakora eky’oburyo okukora endagaano y’obusingye na Israeli, hati ekyareetera aba bagabe kwija kubarwanisa? Nituza kukyetegyereza.
