Ekitebyo 50

Abakazi Babiri Emanzi

ABAISRAELI ku baabaire bagwa omu buremeezi, batakira Yehova. Yehova abagarukamu arikubaheereza abeebembezi emanzi okubahwera. Baibuli neeyeta abeebembezi aba abaramuzi. Yoshua akaba ari omuramuzi w’okubanza, kandi bamwe aha baramuzi ahanyima ye bakaba bari Otinieli, Ehudi na Shamugaari. Kwonka babiri aha bantu abaayambire Israeli n’abakazi, Debora na Yayeli.

Debora n’omurangikazi. Yehova naamuha obutumwa oburikukwata aha biro by’omu maisho, reero nawe agambira abantu eki Yehova agambire. Debora kandi n’omuramuzikazi. Naashutama ahansi y’omuti gw’omukindo omu kibungo, reero abantu baija okutunga obuhwezi omu buremeezi bwabo.

Omu bunaku obu, Yabini n’omugabe wa Kanaani. Aine ebigaari by’orugamba 900. Amahe ge n’ag’amaani kandi baingi aha Baisraeli bagyemirwe kuba abaheereza ba Yabini. Omukuru w’amahe g’omugabe Yabini naayetwa Sisera.

Eizooba rimwe, Debora ayohereza omuramuzi Baraki, kandi amugira ati: ‘Yehova yaagira ati: “Twara abashaija 10,000 kandi obeebembere muze aha Rushozi Tabora. Okwo niinyija kubareetera Sisera. Kandi niinyija kumubaheereza mumusingure n’amahe ge.”’

Baraki agambira Debora ati: ‘Niinyija kugyenda waaba noogyenda naanye.’ Debora agyenda nawe, kwonka agira Baraki ati: ‘Torikwija kutunga ekitiinisa ahabw’okusingura, ahabw’okuba Yehova naija kuhayo Sisera omu mikono y’omukazi.’ Kandi eki kiba nikwo kyaba.

Baraki ashuuma kuruga aha Rushozi Tabora kubugana abaserikare ba Sisera. Ahonaaho Yehova areeta omwijuzo gw’amaizi, kandi baingi aha baserikare abazigu barohama. Kwonka Sisera atsyoka omu kigaari kye airuka ahunga.

Bwanyima y’akaanya Sisera ahika aha ihema rya Yayeli. Yayeli amwakiira, amutaatsya omu ihema kandi amuha amate g’okunywa. Amate gamureetera okuhungira, kandi handi hakye agwejegyerera kimwe. Bwanyima Yayeli aihayo enkondo y’eihema agiteera omu mutwe gw’ogu mushaija mubi. Bwanyima, Baraki ku aija, Yayeli amworeka omutumbi gwa Sisera! Mbwenu hati noobaasa kureeba ngu eki Debora yaagambire kikahikiirira.

Aha muheru, Yabini nawe aitwa, kandi Abaisraeli bagaruka batunga obusingye kumara akaanya kakye.

Abaramuzi 2:14-22; 4:1-24; 5:1-31.