Ekitebyo 49

Eizooba Okuguma Ryemereire

REEBA Yoshua. Ariyo naagira ngu: ‘Iwe izooba ‘we, yemerera!’ Kandi kwo eizooba ryemerera. Riguma ryemereire ahaiguru omu mwanya kumara eizooba ryona. Yehova niwe yaarireetera okwemerera! Kwonka ka tureebe ahabw’enki Yoshua arikwenda eizooba kuguma ririkwaka.

Aba bagabe babi bataano ab’omu nsi ya Kanaani ku baatandikire kurwanisa aba Gibeoni, aba Gibeoni boohereza omushaija kushaba Yoshua obuhwezi. Agira ati: ‘Rahuka kwija ei turi otujune! Ahakuba abagabe boona ab’omu bibungo beeteeraine kurwanisa abairu baawe.’

Ahonaaho Yoshua n’engabo ze zoona bagyenda. Ekiro kyona baraara nibagyenda. Ku bahika Gibeoni, abaserikare b’abagabe bari bataano batiina munonga kandi batandika kuhunga. Kandi Yehova areeta emengo z’orubaare kugwa kuruga omu iguru, kandi abaitsirwe orubaare bakira abu abashaija ba Yoshua endwani baitsire.

Yoshua naareeba ngu eizooba riri haihi kurenga. Nibuza kwira kandi abaserikare baingi ab’abagabe bari bataano nibaza kuhunga. Ekyo nikyo Yoshua yaashabiire Yehova kandi akagira ati: ‘Iwe eizooba ‘we, yemerera!’ Kandi eizooba ku ryagumire niryaka, Abaisraeli baabaasa kusingura orugamba rwabo.

Hariyo abandi bagabe babi baingi omuri Kanaani abarikwanga abantu ba Ruhanga. Yoshua n’engabo ze kikabatwarira emyaka nka mukaga okusingura abagabe 31 ob’omu nsi egyo. Ku baaherize kubasingura, Yoshua yaahamya ngu ensi ya Kanaani yaabaganisizibwa ezo nganda ezaabaire nizenda omwanya.

Emyaka mingi ehinguraho, kandi bwanyima Yoshua afa aine emyaka 110 ey’obukuru. Obu Yoshua n’abanywani be baabaire bariho, abantu bakaba niboorobera Yehova. Kwonka aba bashaija barungi ku baafiire, abantu baatandika kukora ebintu bibi kandi eki kyabareetera okugwa omu kabi. Buzimazima obu nibwo barikwetenga obuhwezi bwa Ruhanga.

Yoshua 10:6-15; 12:7-24; 14:1-5; Abaramuzi 2:8-13.