Engo za Yeriko
Ekitebyo 46
Engo za Yeriko
N’ENKI ekirikureetera ezi ngo za Yeriko kugwa? Nooshusha oti kajugujugu mpango yaaziteera. Kwonka omu biro ebyo, bakaba bataine zaakajugujugu; n’obu zaakuba embundu. N’eky’okutangaaza kya Yehova ekindi! Ka twetegyereze oku kyabaireho.
Hurikiza eki Yehova arikugambira Yoshua: ‘Iwe n’abashaija baawe abarwani mugyende mwehinguririze orurembo. Murwehinguririze omurundi gumwe buri-izooba okumara ebiro mukaaga. Mugyende n’eshanduuko y’endagaano. Abanyamurwa mushanju baine kwebeembera eshanduuko kandi bateere enzamba zaabo.’
‘Aha izooba rya mushanju mwehinguririze orurembo emirundi mushanju. Bwanyima muteere enzamba zaanyu kandi buri omwe ateere orwari rw’orugamba. Aho ebisiika by’orugo nibiija kukumbagara bigwe ahansi!’
Yoshua n’abantu bakora nk’oku Yehova yaabagambira. Barikwehinguririza, buri omwe aguma ahunami. Tihaine n’omwe orikugamba ekigambo na kimwe. Ekirikuhurirwa kyonka n’amaraka g’enzamba hamwe n’endigito y’ebigyere byabo. Abazigu b’abantu ba Ruhanga omuri Yeriko baine kuba baabaire batiinire. Nooreeba ogwo mugoye gurikutukura ogurikureeretera omu dirisa? Egyo dirisa n’ey’oha? Eego, Rahabu niwe akozire eki entatsi ibiri zaamugambiire kukora. Ab’eka ye yoona bari omu nju nawe nibareeba ekirikubaho.
Aha muheru, aha izooba rya mushanju, bwanyima y’okwehinguririza orurembo emirundi mushanju, enzamba zijumeera, abashaija abarwani bateera orwari, kandi ebisiika by’orugo bigwa. Reero Yoshua agira ati: ‘Mwite buri muntu omu rurembo kandi murwotsye. Mwotsye buri kintu. Mubiikye efeeza, ezaabu, ebikomo, n’emiringa y’ebyooma byonka kandi mubiheyo kuza omu ibiikiro ry’eihema rya Yehova.’
Yoshua agambira entatsi ziri ibiri ati: ‘Mutaahe omu nju ya Rahabu, mumwihemu n’ab’eka ye boona.’ Rahabu n’ab’omuka ye bajunwa, nk’oku entatsi zaabaire zimuraganiise.
