Enkoni ya Arooni Okumeraho Ebimuri
Ekitebyo 39
Enkoni ya Arooni Okumeraho Ebimuri
REEBA ebimuri n’endozi ebimezire aha mubimbiiro nari aha nkoni egi. Egi n’enkoni ya Arooni. Ebimuri ebi hamwe n’ebijuma ebihiisize bikamera aha nkoni ya Arooni omu kiro kimwe kyonka! Ka tureebe n’ahabw’enki.
Hati Abaisraeli batwire nibazengyerera kumara omwanya. Bamwe aha bantu tibarikuteekateeka ngu Musa ashemereire kuba omwebembezi nari ngu Arooni ashemereire kuba omunyamurwa mukuru. Koora n’omwe aha barikuteekateeka batyo, kandi Dasani na Abiraamu hamwe n’abandi beebembezi ba bantu 250 nikwo barikuteekateeka. Aba boona baija bagambira Musa bati: ‘Ahabw’enki mwekurize muketa ahaiguru yaitu twena?’
Musa agambira Koora n’abakuratsi be ati: ‘Omu kasheeshe mutware ebyoterero kandi mubiteho obubaane. Reero mwije omu ihema rya Yehova. Nitwija kureeba ou Yehova araatoorane.’
Omu kasheeshe, Koora n’abakuratsi be 250 baija omu ihema. Abandi baingi baija kushemba abashaija aba. Yehova agira ekiniga kingi munonga. Musa agira ati: ‘Mwirire hare n’amahema g’aba bashaija babi. Mutakaakwata aha kintu kyabo kyona.’ Abantu bahurikiza, kandi bairira hare n’eihema rya Koora, Dasani na Abiraamu.
Reero Musa agira ati: ‘Eki nikyo muraamanyireho ou Yehova atooraine. Ensi neija kwashama emire aba bashaija.’
Musa ku yaaherize ati kukigamba, ensi yaayashama. Eihema rya Koora n’ebintu bye byona na Dasani na Abiraamu n’abo boona abaabaire bari nabo baashuuma okuzimu, eitaka ryabashweka. Abantu ku bahuriire okutaka kw’abo abariyo nibamirwa ensi, baateera orwari nibagira bati: ‘Mwirukye! Ensi naitwe neebaasa kutumira!’
Koora n’abakuratsi be 250 bakiri haihi n’eihema. Atyo Yehova nikwo kwohereza omuriro, gukabosya boona bakahwaho. Bwanyima Yehova nikwo kugambira mutabani wa Arooni, Eleazaari okutwara ebyoterero by’abashaija abafiire kukoramu eby’okushweka eitambiro. Eky’okushweka eitambiro eki n’ekiijutsyo aha Baisraeli ngu tihariho n’omwe okwihaho Arooni n’abatabani abashemereire kukora nk’abanyamurwa ba Yehova.
Kwonka Yehova naayenda kworeka kurungi ngu Arooni n’abatabani nibo abu atooraine okuba abanyamurwa. N’ahabw’ekyo agambira Musa ati: ‘Reka omwebembezi wa buri ruganda rwa Israeli areete enkoni ye. Ahabw’oruganda rwa Leevi, Arooni areete enkoni ye. Reero zoona ozite omu ihema ry’okubugaabuganiramu omu maisho g’eshanduuko y’endagaano. Enkoni y’omushaija ou ntooraine neija kumeraho ebimuri.’
Musa ku yaagiire kureeba omu kasheeshe akaakuratireho, ashanga enkoni ya Arooni eine ebimuri n’ebijuma by’endozi bihiisize! Mbwenu nooreeba hati ahabw’enki Yehova yaareetaire enkoni ya Arooni kumeraho ebimuri?
Okubara 16:1-49; 17:1-11; 26:10.
