Entatsi 12
Ekitebyo 38
Entatsi 12
REEBA ebyo bijuma ebi abashaija beekoreire. Reeba ogwo mutsitsa gw’emizabibu oku guri muhango. Nikyetengyesa abashaija babiri kugwekorera aha kiti. Kandi reeba ebijuma by’emitiini n’eby’amakomamahanga. Ebijuma birungi nk’ebi birugire nkahi? Nibiruga omu nsi ya Kanaani. Ijuka ngu Kanaani niyo Abrahamu, Isaaka na Yakobo baabaire nibatuura. Kwonka ahabw’enjara Yakobo, n’eka ye yoona, bakarugayo baaza Misri. Hati, hahingwireho emyaka nka 216, Musa ayebembeire Abaisraeli kugaruka Kanaani. Baahika omu ihamba omu mwanya ogurikwetwa Kadeshi.
Abantu babi nibatuura omu nsi ya Kanaani. N’ahabw’ekyo Musa ayohereza entatsi 12, kandi abagira ati: ‘Mumanye abantu abagitwiremu ku baraabe bari baingi nari bakye, kandi ku baraabe baine amaani nari shi batagaine. Mwetegyereze yaaba eitaka niryeza. Kandi mureebe ngu mwareeta bimwe aha bijuma byayo.’
Entatsi ku zigaruka Kadeshi, zigambira Musa ziti: ‘N’ekya buzima n’ensi nungi.’ Kandi okuhamya eki, booreka Musa bimwe aha bijuma. Kwonka 10 aha ntatsi bagira bati: ‘Abagitwiremu nibahango kandi n’ab’amaani. Nitwija kwitwa ku turagyezeho kutwara ensi egyo.’
Abaisraeli batiina munonga ku bahurira enkuru egi. ‘Nangwa haakiri kuri twagwire omu nsi ya Misri nari tukafeera hanu omu ihamba,’ batyo baba nikwo baagira. ‘Nitwija kufeera omu rugamba kandi abakazi baitu n’abaana baitu nibaija kuba enkwatwa. Ka tweteereho omwebembezi omu mwanya gwa Musa, kandi tugarukye Misri!’
Kwonka babiri aha ntatsi nibeesiga Yehova, kandi bagyezaho kucureeza abantu. Amaziina gaabo ni Yoshua na Kalebu. Bagira bati: ‘Mutakaatiina. Yehova arinaitwe. Nikiija kwanguha okutwara ensi egyo.’ Kwonka abantu banga kuhurikiza. Kandi benda n’okwita Yoshua na Kalebu.
Eki kigwisa Yehova kubi munonga, kandi agambira Musa ati: ‘Tihaine n’omwe ahari abo bantu kuruga aha myaka 20 kugarura ahaiguru oritaaha omu nsi ya Kanaani. Bakareeba eby’okutangaaza ebi naakozire omuri Misri n’omu ihamba, kwonka nabwe tibarikuunyesiga. N’ahabw’ekyo nibaija kuzengyerera omu ihamba kumara emyaka 40 okuhitsya obu omuntu ow’aha muheru arifa.’ Okwihaho Yoshua na Kalebu nibo baritaaha omu nsi ya Kanaani.’
