Ekitebyo 52

Gideoni n’Abashaija Be 300

NOOREEBA ekirikubaho aha? Aba boona n’abashaija ba Israeli abarwani. Abashaija abainami bariyo nibanywa amaizi. Gideoni Omuramuzi niwe ogwo mushaija obeemereire haihi. Ariyo naayetegyereza oku barikunywa amaizi.

Yetegyereze emiringo etarikushushana ei aba bashaija barikunywamu amaizi. Abamwe bainamira kimwe omu maizi. Kwonka omwe naakoresa ekiganja kye kunywa amaizi, kugira ngu abaase kwetegyereza ebimwetoroire. Eki nikikuru, ahakuba Yehova akagambira Gideoni kutoorana abashaija bonka abarikunywa amaizi obwe kunu barikwetegyereza ebirikugyenda omu maisho. Abaatsigaire boona, Ruhanga agira ngu bagarukye owaabo. Ka tureebe ahabw’enki.

Abaisraeli bari omu buremeezi buhango ogundi murundi. Enshonga n’ahabw’okugira ngu tiboorobeire Yehova. Abamidiani babakirize amaani kandi nibabatwaza kubi. N’ahabw’ekyo Abaisraeli batakira Yehova okubahwera, kandi Yehova ahurikiza okutaka kwabo.

Yehova agambira Gideoni okuteerana hamwe amahe, atyo Gideoni arundaana abashaija enkwatangabo 32,000. Kwonka eihe eririkuza kurwanisa Israeli ririmu abashaija 135,000. Baitu Yehova agambira Gideoni ati: ‘Oine abashaija baingi munonga.’ Ahabw’enki Yehova yaagizire atyo?

N’ahabw’okuba Abaisraeli ku baraasingure orugamba, nibabaasa kuteekateeka ngu baasingura ahabwabo bonka. Bakaateekateekire ngu babaire batarikwetenga obuhwezi bwa Yehova okubaasa kusingura. N’ahabw’ekyo, Yehova agambira Gideoni ati: ‘Gambira abashaija abo boona abatiinire bagarukye owaabo.’ Gideoni ku abagambira, abashaija abarwani 22,000 bagaruka omuka. Atsigaza abashaija 10,000 bonka okurwanisa abo baserikare 135,000 boona.

Kwonka hati hurikiza eki Yehova arikugamba! ‘Okyaine abashaija baingi.’ N’ahabw’ekyo agambira Gideoni okutwara aba bashaija kunywa amaizi aha mugyera kandi n’okwohereza omu ka boona abainika emitwe bakanywaisa amaizi omunwa. ‘Niinyija kukuha obusinguzi n’abashaija 300 abaaguma nibeetegyereza ekirikugyenda omu maisho obwe barikunywa amaizi,’ Yehova aba nikwo yaaraganisa.

Obunaku bw’okurwana buhika. Gideoni ata abashaija be omu bicweka bishatu. Aheereza buri mushaija enzamba, n’enyungu zirimu emuri omunda. Ku bwabaire buri omwitumbi, boona beehinguririza orusiisira rw’abaserikare abazigu. Boona, omurundi gumwe baateera enzamba zaabo kandi baata enyungu zaabo, kandi baateera orwari nibagira bati: ‘Rurara ya Yehova n’eya Gideoni!’ Abaserikare abazigu ku baimukire, baashoberwa kandi baatiina. Boona baatandika kuhunga, batyo Abaisraeli baasingura orugamba.

Abaramuzi eshuura 6 okuhika 8.