Ekitebyo 34

Omuringo Musya gw’Eby’Okurya

NOOBASA kumanya ebi abantu bariyo nibatoratoora ahansi? Buri nk’orubaare. Ni twa mutare, kandi nitukyetukye twekuringiriire. Kwonka ti rubaare; n’eby’okurya.

Hahingwireho nk’okwezi kumwe kwonka okwiha obu Abaisraeli baaruga Misri. Bari omu ihamba. Aha tiharikwera by’okurya kandi ahabw’ekyo, abantu batandika kwetomboita, barikugira bati: ‘Noobwe Yehova kuri yaatwitiire omuri Misri. Haakiri okwo yo tukaba twine eby’okurya byona ebi twabaire nitwetenga.’

N’ahabw’ekyo Yehova yaagira ati: ‘Ninza kugwisa eby’okurya nk’enjura kuruga omu iguru.’ Kandi eki nikyo Yehova yaakozire. Omu kasheeshe akaakuratiireho Abaisraeli ku baareebire ebintu ebi ebirikwera bigwire ahansi, baatandika kubuuzana bati: ‘Ebi n’enki?’

Musa yaabagira ati: ‘Ebi n’eby’okurya ebi Yehova yaabaha ngu murye.’ Abantu baabyeta EMAANU. Okunura kwabyo kukaba kuri nka twakeeki oturimu obwoki.

‘Mutorotoore buri muntu ebi arikubaasa kurya,’ Musa agambira atyo abantu. Batyo buri kasheeshe buri omwe nikwo yaabaire akora. Bwanyima, omushana ku gwabaire gwaka, emaanu ehwererera omu itaka.

Musa atyo abagira ati: ‘Hatagira omuntu owaaraazaho emaanu kuhitsya aha izooba erindi.’ Kwonka abamwe tibamworobera. Noomanya ekyabaireho? Omu kasheeshe bashanga emaanu ei batorotoire eijwire enyogori kandi erikunuuka!

Kwonka, hariho ekiro kimwe omu wiiki eki Yehova yaagambiire abantu okutorotooreraho emaanu erikwingana eriya kabiri. Eki n’ekiro kya mukaaga. Kandi Yehova abagambira okubiikaho bimwe aha bibatoratoire okuhika omu kasheeshe, ahabw’okuba akaba atarikwija kugwisa endiijo aha kiro kya mushanju. Ku baabaire babiikaho emaanu aha kiro kya mushanju, ekaba etazamu nyogori kandi etanuuka! Eki n’eky’okutangaaza ekindi!

Emyaka yoona ei Abaisraeli baamazire omu ihamba Yehova aguma naabariisa emaanu.

Okuruga 16:1-36; Okubara 11:7-9; Yoshua 5:10-12.