Ekitebyo 54

Omushaija Orikukirlrayo Kimwe Amaania

NOOMANYA eiziina ry’omushaija orikukirayo amaani owarabaireho? N’omuramuzi orikwetwa Samusooni. Yehova niwe yaahaire Samusooni amaani ge. Na Samusooni atakazairwe, Yehova akagambira nyina ati: ‘Noija kugira enda, ozaare omwana w’omwojo. Naija kwebembera omu kujuna Abaisraeli kuruga omu mikono y’Abafilistia.’

Abafilistia n’abantu babi abarikutuura omuri Kanaani. Baine abashaija abarwani baingi, kandi buzima nibatwaza kubi Abaisraeli. Rimwe, Samusooni ku yaabaire naaza ei Abafilistia barikutuura, ekicuncu kihango kiija nikitsinda kumubugana. Kwonka Samusooni aita ekicuncu ekyo n’emikono ye yonka. Kandi aita amagana n’amagana g’Abafilistia ababi.

Bwanyima Samusooni akundana n’omukazi orikwetwa Delila. Abeebembezi b’Abafilistia buri omwe araganisa ngu naija kuheereza Delila ebicweka by’efeeza 1,100 ku araabagambire ekirikureetera Samusooni kugira amaani maingi. Delila naayenda esente ezo zoona. Ti munywani murungi ahari Samusooni, n’aha bantu ba Ruhanga. N’ahabw’ekyo aguma naabuuza Samusooni kumugambira ekirikumureetera kugira amaani maingi munonga.

Aha muheru, Delila abaasa kureetera Samusooni kumugambira omubonano gw’amaani ge. Amugira ati: ‘Eishokye ryangye tibakarimwaga. Okuruga omu buto bwangye, Ruhanga akantoorana kuba omuheereza we ow’omutaano orikwetwa Omunaziiri. Ku baakuumwa eishokye, obwo nkaahwamu amaani

Mbwenu, Delila ku amanya eki, agwejegyeza Samusooni aha bibero bye. Bwanyima ayeta omushaija kutaahamu kumwa eishokye rye. Samusooni ku aimuka, ashanga ataine maani ge. Abafilistia aho bataahamu bamukwata. Bamutondoramu amaisho gombi kandi bamuhindura omuhuuku.

Eizooba rimwe Abafilistia bagira obugyenyi buhango bw’okuramya Dagoni ruhanga waabo, kandi bareeta Samusooni kuruga omu kihome kubazaanira. Kwonka obwe eishokye rye rikaba ryakuzire. Samusooni agira omwojo owaabaire amukwaitse omukono ati: ‘Ka nkwate enyomyo ezi enju ehamiizeho.’ Bwanyima Samusooni ashaba Yehova kumuha amaani, kandi akwata ezo nyomyo. Agambira ahaiguru ati: ‘Ka nfe n’Abafilistia.’ Hariho Abafilistia nka 3,000 aha bugyenyi obwo, kandi Samusooni ku asindika enyomyo, enju yoona egwa kandi eita aba bantu babi boona.

Abaramuzi eshuura 13 okuhika 16.