Omushuma Omuri Israeli
Ekitebyo 47
Omushuma Omuri Israeli
REEBA eki ogu mushaija ariyo naaziika omu ihema! Ekijwaro kirungi, omuhimba gw’ezaabu hamwe n’ebicweka by’efeeza. Yaabiiha omu rurembo Yeriko. Kwonka n’enki ekyabaire kishemereire kukorerwa ebintu by’omuri Yeriko? Noijuka?
Bikaba bishemereire kuhwerekyerezibwa, kandi ezaabu n’efeeza bikaba bishemereire kuheebwayo omu ibiikiro ry’omu ihema rya Yehova. N’ahabw’ekyo abantu aba baagomera Ruhanga. Baiba ebya Ruhanga. Eiziina ry’omushaija ogwo ni Akani, kandi abo abari nawe ni bamwe aha b’omu ka ye. Ka tureebe ekyabaireho.
Bwanyima ya Akani kwiba ebintu ebi, Yoshua akoohereza bamwe aha bashaija kurwanisa ab’omu rurembo Ai. Kwonka basingurwa omu rugamba. Bamwe baitwa, kandi abaatsigaire baahunga. Yoshua yaaguubwa kubi munonga. Yaajumara ahansi kandi yaashaba Yehova ati: ‘Ahabw’enki oikiriize eki kutuhikaho?’
Yehova Yaamugarukamu ati: ‘Imuka! Abaisraeli basiisire. Batwaire bimwe aha bintu ebyabaire biri eby’okuhwerekyerezibwa nari eby’okuteebwa omu ihema rya Yehova. Baibire omwenda murungi kandi baagushereka. Tindikwija kubaheereza omugisha okuhitsya obu muraabihwerekyereze, hamwe n’ogwo otwaire ebintu ebyo.’ Yehova kandi agira ngu naaza kworeka Yoshua ogwo mushaija mubi.
N’ahabw’ekyo Yoshua ateeranira hamwe abantu boona, kandi Yehova atooranamu Akani ogwo mushaija mubi. Akani agira ati: ‘N’eky’amazima ncumwire. Ndeebire ekijwaro kirungi, hamwe n’omuhimba gw’ezaabu na n’ebicweka by’efeeza. Mbikunzire munonga kandi naabitwara. Niimwija kubishanga bisherekirwe omu itaka omu ihema ryangye.’
Ebintu ebi ku byabonekire, byareeterwa Yoshua, yaagira Akani ati: ‘Otwitiire ki kubi? Naiwe Yehova yaaza kukubonereza!’ Aho Abaisraeli boona baitsa Akani n’ab’eka ye yoona amabaare. Ekyo tikirikworeka ngu titushemereire nakakye kutwara ebintu ebitari byaitu?
Bwanyima Abaisraeli bagaruka baza kurwanisa Ai. Aha murundi ogu, Yehova ayamba abantu be, batyo basingura orugamba.
