Ekitebyo 44

Rahabu Okushereka Entatsi

ABA bashaija bari omu kabi. Baine kuhunga kitari ekyo nibaza kwitwa. N’entatsi z’Abaisraeli, kandi ogwo mukazi orikubahwera ni Rahabu. Rahabu naatuura aho omu nju eri aha kisiika ky’orurembo Yeriko. Ka twetegyereze ahabw’enki aba bashaija bari omu kabi.

Abaisraeli beteekateekire kwambuka Omugyera Yorudani kuza omu nsi ya Kanaani. Kwonka batakambukire, Yoshua ayohereza entatsi ibiri. Abagambira ati: ‘Mwirooko mutate ensi egyo hamwe n’orurembo Yeriko.’

Entatsi ku zihika omuri Yeriko, baza omu nju ya Rahabu. Kwonka hagira owaagambira omugabe wa Yeriko ati: ‘Abaisraeli babiri baija omuri eki kiro okutata ensi egi.’ Ku ahurira eki, omugabe ayohereza abashaija kwija ahari Rahabu, kandi bamuragiira bati: ‘Shohoza abashaija abu oine omu nju yaawe!’ Kwonka Rahabu akaba asherekire entatsi ezi aha mutwe gw’enju ye. Atyo Rahabu agira ati: ‘N’eky’amazima haine abashaija abaizire omwangye, kwonka timmanyire ei babaire nibaruga. Bagyenzire burikwira, batakakingire orwigi rw’eirembo. Ku muraarahukye, nimwija kubakwata!’ Batyo abo bashaija bagyenda nibabasherura.

Ku baaherize kugyenda, Rahabu yairuka yaaza aha mutwe gw’enju. Yaagambira entatsi ati: ‘Nimmanya ku Yehova arikuza kubaha egi nsi. Tukahurira oku Yehova yaayomize amaizi g’Enyanja Erikutukura obu mwabaire nimuruga omuri Misri, kandi oku yaitsire abagabe bombi Sihooni na Ogi. Mbagiriire eby’embabazi, n’ahabw’ekyo mundaganise, nabeeshengyereza ngu naimwe muraangirira embabazi. Mujune tata na maawe, banyaanyazi na barumuna bangye.’

Entatsi zimuraganisa ngu niziija kukora zityo, kwonka Rahabu aine kugira eki yaakora. Entatsi zimugira ziti: ‘Twara aka kagoye akarikutukura okakome omu dirisa yaawe, kandi oteeranire omu nju yaawe abanyabuzaare boona. Kandi twena ku turigaruka kutwara Yeriko, nitwija kureeba aka kagoye omu dirisa yaawe kandi tituriita omuntu weena omu nju yaawe.’ Entatsi ku zaagarukire ahari Yoshua, zaamugambira byona ebyabaireho.

Yoshua 2:1-24; Abaheburaayo 11:31.