Ekitebyo 80

Abantu ba Ruhanga Nibaruga Omuri Babulooni

HAIHI emyaka nk’ebiri ehingwireho okwiha obu Babulooni yaakwatwa Abameedi n’Abaperesi. Kandi hati reeba ekirikubaho! Eego, Abaisraeli bariyo nibaruga omuri Babulooni. Bakarekurwa bata? N’oha owabaikiriize kugyenda?

Kuuro, omugabe wa Buperesi, niwe yaabaikiriize. Ira munonga Kuuro atakazairwe, Yehova akaragiira omurangi we Isaaya kuhandika ebirikumukwataho ati: ‘Oryakora ekyo ekindikwenda ngu okore. Enyigi z’amarembo ziryarekwa ziigwire ahabwawe okubaasa kukwata orurembo.’ Kandi kwo Kuuro akeebembera omu kukwata Babulooni. Abameedi n’Abaperesi bakataaha omu rurembo nyekiro barikurabira omu nyigi ezaarekirwe ziigwire.

Kandi omurangi wa Yehova Isaaya akagira ngu Kuuro akaba naija kuheereza ekiragiro ngu Yerusaalemu na hekalu yaayo bigarukye byombekwe. Kuuro akaheereza ekiragiro eki? Eego, akakiheereza. Eki nikyo Kuuro yaagambiire Abaisraeli: ‘Mwirooko, hati, mugyende Yerusaalemu mwombekye hekalu ya Yehova, Ruhanga waanyu.’ Kandi eki nikyo Abaisraeli bariyo nibaza kukora.

Kwonka ti Baisraeli boona abaabaire bari omuri Babulooni ngu nibabaasa kuza aha rugyendo ruraingwa kugaruka Yerusaalemu. N’orugyendo ruraingwa munonga, rwa mailo nka 500 (kiromita nka 800) kandi baingi nibakuru abamwe n’abarwaire kubaasa kugyenda orugyendo nk’orwo. Beitu hariho n’enshonga ezindi ahabw’enki abandi batarikubaasa kugyenda. Kwonka Kuuro agambira abo abatarikubaasa kugyenda ati: ‘Muheereze abo abarikugarukayo kwombeka Yerusaalemu na hekalu efeeza, ezaabu n’ebindi biconco.’

N’ahabw’ekyo, ebiconco bingi biheebwa aba Baisraeli abari omu rugyendo kuza Yerusaalemu. Kandi, Kuuro abaheereza enyabya hamwe n’ebikopo ebi Omugabe Nebukadeneeza yaihire omu hekalu ya Yehova obu yaahwerekyereza Yerusaalemu. Abantu baine ebintu bingi by’okwekorera kutwara kugyenda nabyo.

Bwanyima y’emyezi nk’ena bari omu rugyendo, Abaisraeli bahika omuri Yerusaalemu omu bwire bwenyine. Hahweireho emyaka 70 okwiha obu orurembo rwahwerekyerezibwa, kandi ensi ekaba erekirweho hatarimu omuntu n’omwe. Kwonka n’obu Abaisraeli baagaruka omu nsi yaabo ahabwabo, nibiija kugira oburemeezi nk’oku turaije kwega omu birikukurataho.

Isaaya 44:28; 45:1-4; Ezera 1:1-11.