Bakaba Batarikubaasa Kwinama
Ekitebyo 77
Bakaba Batarikubaasa Kwinama
NOIJUKA orikuhurira eby’aba batsigazi bashatu? Eego, nibanywani ba Danieli abaayangire kurya ebyabaire bitari birungi ahabwabo. Ababulooni bakabeeta Seduraaka, Mesaaki, na Abedeneego. Mbwenu hati bareebe. Ahabwaki bo batarikwinamira eki kishushani kihango nk’abandi boona? Ka twetegyereze.
Noijuka ebiragiro ebi Yehova we wenka yaahandiikire ebirikwetwa Ebiragiro Ikumi? Eky’okubanza ahari ebi n’eki: ‘Otariramya baaruhanga abandi nyowe ndiho.’ Abatsigazi aba barikworobera eki kiragiro, hoona n’obu kitari kintu kyanguhi kukora.
Nebukadeneeza, omugabe wa Babulooni, ayetsire abantu bakuru baingi okuheereza eki kishushani eki ayombekire ekitiinisa. Yaaheza kugambira abantu boona ati: ‘Ku muraahurire amaraka g’enzamba, enanga, n’ebindi byona ebirikujumeera, mujuumare ahansi, muramye eki kishushani ky’ezaabu. Omuntu weena oraayange kujuumara ahansi kukiramya, ahonaaho naija kunagwa omu kikoomi ky’omuriro.’
Nebukadeneeza ku akimanya ngu Seduraaka, Mesaaki, na Abedeneego tibaakiramya, aitwa ekiniga kingi. Aragiira ngu babareete omu maisho ge. Abaikiriza ogundi murundi okukiinamira. Kwonka aba batsigazi nibeesiga Yehova. Bagambira Nebukadeneeza bati: ‘Ruhanga waitu ou tuheereza naabaasa kutujuna. Kwonka n’obu yaakuba atatujunire, titurikwija kuramya eki kishushani kyawe ky’ezaabu.’
Nebukadeneeza ku ahurira eki agirira kimwe ekiniga kingi. Aho haihi hariho ekikoomi atyo aragiira ati: ‘Mukomeere omuriro gwake n’amaani okukira oku gutakabaga emirundi mushanju!’ Bwanyima aragiira abashaija b’amaani omu mahe ge okuboha Seduraaka, Mesaaki, na Abedeneego n’okubanaga omu kikoomi. Ekikoomi nikibuguma munonga, n’ahabw’ekyo abashaija be b’amaani baitwa endimi z’omuriro. Kandi shi abo batsigazi bashatu abu baanagire omu kikoomi?
Omugabe aringuriza omu kikoomi, kandi atiina munonga. Ayebuuza ati: ‘Hari abashaija abu twanaga omu kikoomi babohirwe baaba batari bashatu?’
Abaheereza be bamugarukamu bati: ‘Eego nikwo twakora.’
Agira ati: ‘Mbwenu nindeeba abashaija bana nibagyendagyenda omu muriro. Tibabohirwe kandi tihaine oku babaire. Kandi emishushire y’owa kana n’eshusha ey’omwana wa baaruhanga.’ Omugabe airira haihi n’omuryango gw’ekikoomi ky’omuriro ogurikubuguma, agira ati: ‘Seduraaka! Mesaaki! Abedeneego! Imwe abaheereza ba Ruhanga Orikukira Boona, nimushohore mwije aha!’
Ku bashohora, buri omwe naareeba ku omuriro gutaine ki gubaitsize. Bwanyima omugabe agira ati: ‘Ruhanga wa Seduraaka, Mesaaki, na Abedeneego asiimwe! Ayoheereize maraika we yaabajuna ahakuba baangire kwinamira n’okuramya ruhanga ondiijo kureka owaabo buzima.’
Eki t’eky’okureeberaho kirungi eky’obwesigwa ahari Yehova eki twine kukuratira?
