Ekitebyo 83

Ebisiika by’Orugo rwa Yerusaalemu

REEBA omurimo ogurikugyenda omu maisho aha. Abaisraeli nibakora n’amaani okwombeka ebisiika by’orugo rwa Yerusaalemu. Obu omugabe Nebukadeneeza yaahwerekyereza Yerusaalemu emyaka 152 enyima, akagwisa ebisiika by’orurembo kandi yaayotsya n’enyigi zaarwo. Omu kubanza, Abaisraeli obu baaruga Babulooni, tibaratandikiireho kwombeka ebisiika by’orurembo.

Nooteekateeka ngu abantu batwire nibahurira bata okutuura aha egi myaka yoona bataine rugo rwehinguririze orurembo rwabo? Batwire nibahurira bataine burinzi. Abazigu baabo bakaabaasize kubatahirira batagumiirwe. Kwonka hati ogu mushaija Nehemia ariyo naahwera abantu okwombeka ebisiika ebi ogundi murundi. Nehemia we nomumanya?

Nehemia n’Omuisraeli orikuruga omu rurembo Shushani, ei Morodekai na Esteeri barikutuura. Nehemia akaba naakora omu kikaari ky’omugabe, n’ahabw’ekyo aine kuba yaabaire ari omunyamukago murungi wa Morodekai na Esteeri muka omugabe. Kwonka Baibuli terikugira ngu Nehemia akakorera Iba wa Esteeri, Omugabe Ahasuero. Akakorera omugabe owaakuratiireho omugabe Aruta-gizakiseesi.

Ijuka, Aruta-gizakiseesi n’omugabe murungi owaahaire Ezera esente zoona ez’okutwara Yerusaalemu kwombekyesa hekalu ya Yehova. Kwonka Ezera tarayombekire ebisiika by’orurembo ebyabaire bishenyukire. Ka tureebe okukyabaireho, oku Nehemia yaakozire omurimo ogu.

Hahweireho emyaka 13 okwiha obu Aruta-gizakiseesi yaaheereza Ezera empiiha z’okwombeka hekalu. Nehemia hati n’omuheereza mukuru wa viinyo aha Mugabe Aruta-gizakiseesi. Eki nikimanyisa ngu naagaburira omugabe viinyo, kandi ahamya ngu tihaine owaheereza omugabe obutwa. N’omurimo mukuru munonga.

Mbwenu, izooba rimwe, mwene ishe wa Nehemia Hanaani n’abandi bantu kuruga omu nsi ya Israeli baija kutaayaayira Nehemia. Baamugambira oburemeezi obu Abaisraeli baine, hamwe n’oku ebisiika bya Yerusaalemu bikiri ahansi. Eki kireetera Nehemia kugira obusaasi bwingi, kandi ashaba Yehova aha bikwatiraine nabyo.

Eizooba rimwe, omugabe ayetegyereza ngu Nehemia aine obusaasi, atyo amubuuza: ‘Ahabw’enki noreebeka oine obusaasi bwingi?’ Nehemia amugambira ngu n’ahabw’okuba Yerusaalemu eri omu muringo mubi ngu kandi ebisiika byayo bikashenyuka. Omugabe amubuuza ati: ‘N’enki eki orikwenda?’

Nehemia amugira ati: ‘Ka ngyende nze Yerusaalemu, kugira ngu mbaase kugaruraho ebisiika by’orugo.’ Omugabe Aruta-gizakiseesi n’omunyambabazi. Agira ngu Nehemia agyende, kandi amuhwera okutunga emiti y’okwombekyesa. Bwanyima y’omwanya mukye Nehemia aija Yerusaalemu, agambira abantu entebeekanisa ye. Bakunda ekiteekateeko kye kandi bagira bati: ‘Ka tutandikye twombekye.’

Abazigu b’Abaisraeli ku bareeba orugo rwaimuka, nikwo kugira bati: ‘Nituza kuzayo, tubiite, reero twemereze omurimo gw’okwombeka.’ Kwonka Nehemia ku ahurira atyo, aheereza abombeki zaarurara n’amacumu. Kandi agira ati: ‘Mutatiina abazigu baitu. Murwanire beene waanyu, abaana baanyu, abakazi baanyu n’amaka gaanyu.’

Abantu n’amamanzi. Baguma baine ebikwato byabo beeteekateekire, nyomushana na nyekiro baguma nibombeka. Batyo omu biro 52 byonka engo zihwa kwombekwa. Hati abantu nibahurira baine oburinzi bari omu rurembo. Nehemia na Ezera beegyesa abantu ebiragiro bya Yehova, kandi abantu bashemererwa.

Kwonka baitu ebintu tibikabaire nk’oku byabaire biri kare obu Abaisraeli baabaire batakatwirwe nk’abasibe omuri Babulooni. Abantu nibategyekwa omugabe wa Buperesi kandi nibaragiirwa kumuheereza. Kwonka Yehova akaraganisa ngu naija kwohereza omugabe musya, ngu kandi naija kureeta obusingye omu bantu. Ogu mugabe n’oha? Naija kureeta ata obusingye omu nsi? Emyaka nka 450 ehinguraho hataine ekyayetegyereziibwe ahari eki. Bwanyima habaho okuzaarwa kukuru munonga kw’omwana. Beitu eki nakyo n’ekitebyo okwakyo.

Nehemia eshuura 1 okuhika 6.