Ekitebyo 82

Morodekai na Esteeri

REKA tugarukyeyo enyima emyaka mikye Ezera atakagiire Yerusaalemu. Morodekai na Esteeri n’Abaisraeli bakuru munonga omu bugabe bwa Buperesi. Esteeri n’omugabekazi, kandi mwihwa we Morodekai niwe wa kabiri aha mugabe ori omu bushoboorozi. Ka tureebe oku eki kyabaireho.

Abazaire ba Esteeri bakafa akiri omwereere, atyo Morodekai yaamworora. Ahasuero, omugabe wa Buperesi, aine ekikaari ky’obugabe omu rurembo Shushani, kandi Morodekai n’omwe aha baheereza be. Mbwenu, eizooba rimwe, muka omugabe Vasita ayanga kumworobera, n’ahabw’ekyo omugabe atoorana omukazi musya kuba omugabekazi we. Noomanya omukazi ou yaatoraine? Ee, ni nyamurungi Esteeri omuto!

Nooreeba ogu mushaija w’amaryo ou abantu barikwinamira? Ni Hamani. N’omuntu mukuru omuri Buperesi. Hamani naayenda ngu Morodekai, ou orikureeba ashutami aho, ngu nawe amwinamire. Kwonka Morodekai tarikubaasa. Tarikuteekateeka ngu kihikire okwinamira omushaija mubi nk’ogu. Eki kireetera Hamani kugira ekiniga kingi. Kandi eki nikyo yaakozire.

Hamani agambira omugabe ebishuba ebirikukwata aha Baisraeli. Amugira ati: ‘N’abantu babi abatarikworobera ebiragiro byawe. Bashemereire kwitwa.’ Ahasuero tarikumanya ngu Esteeri omukazi we n’Omuisraeli. N’ahabw’ekyo ahurikiriza ebya Hamani, kandi ataho ekiragiro ngu aha izooba nanka, Abaisraeli boona baine kwitwa.

Morodekai ku amanya eby’eki kiragiro, agira obusaasi bwingi. Ayoherereza Esteeri obutumwa obu: ‘Ogambire omugabe kandi omweshengyereze kutujuna.’ Kikaba nikihenda ebiragiro omuri Buperesi okuza kureeba omugabe okwihaho yaakweta. Kwonka we Esteeri naazayo atabandize kwetwa. Omugabe amugororeraho enkoni ye ey’ezaabu ekirikumanyisa ngu tarikuza kwitwa. Esteeri ayeta omugabe na Hamani aha kihuuro. Aho omugabe abuuza Esteeri eki arikwenda ngu amukorere. Esteeri agira ngu naija kumugambira we na Hamani ku baraije aha kihuuro ekindi ekiro ekiraakurateho.

Aha kihuuro ekyo, Esteeri agambira omugabe ati: ‘Nyowe n’abantu bangye turi ab’okwitwa.’ Omugabe agira ekiniga. ‘N’oha ogwe orikwenda kukora ekintu nk’ekyo?’ omugabe abuuza.

Esteeri agira ati: ‘Omushaija ogwo, omuzigu, ni Hamani ogu omubi!’

Mbwenu hati omugabe aitirwa kimwe ekiniga. Aragiira ngu Hamani aitwe. Bwanyima, ahindura Morodekai kuba owa kabiri ahari we omu bushoboorozi. Morodekai bwanyima ataho oburyo kubaasisa Abaisraeli kwerwanaho aha izooba eri baabaire baine kwitirwaho. Ahabw’okugira ngu hati Morodekai n’omuntu mukuru, abantu baingi bahwera Abaisraeli, kandi babajuna kuruga omu mikono y’abazigu baabo.

Ekitabo kya Baibuli ekya Esteeri.