Ekitebyo 81

Okwesiga Obuhwezi bwa Ruhanga

ABANTU baingi munonga bakaza omu rugyendo ruraingwa kuruga Babulooni kuza Yerusaalemu. Kwonka ku baahikireyo, baashanga Yerusaalemu eri amatongo. Tihaine n’omwe orikutuuramu. Abaisraeli baine kugaruka kwombeka byona busya.

Kimwe aha bintu ebi baabandize kwombeka n’itambiro. Ogu n’omwanya ogu barikuheeraho empongano, nari shi ebiconco ahari Yehova. Bwanyima y’emyezi mikye, Abaisraeli batandika kwombeka hekalu. Kwonka abazigu abarikutuura omu bicweka ebibahereire tibarikwenda Abaisraeli kugyombeka. N’ahabw’ekyo bagyezaho kubatiinatinisa ngu bareekyere aho. Aha muheru, aba bazigu bareetera omugabe musya owa Buperesi kutaho ekiragiro kwemereza omurimo gw’okwombeka.

Emyaka ehinguraho. Hati hahweireho emyaka 17 okwiha obu Abaisraeli baagaruka kuruga omuri Babulooni. Yehova ayohereza abarangi be Hagai na Zekaria okugambira abantu kugaruka kutandika kwombeka. Abantu beesiga obuhwezi bwa Ruhanga, kandi boorobera abarangi. Bagaruka bombeka, n’obu ekiragiro kirikugira ngu tibashemereire kukora ekyo.

N’ahabw’ekyo omukungu w’omuri Buperesi orikwetwa Tatenai aija kubuuza Abaisraeli obahaire obushoboorozi bw’okwombeka hekalu. Abaisraeli bamugambira ngu obu baabaire bari omuri Babulooni, Omugabe Kuuro akabagambira ati: ‘Mwirooko, hati muze Yerusaalemu mwombekye hekalu ya Yehova, Ruhanga waanyu.’

Tatenai ayohereza ebaruha Babulooni kandi abuuza yaaba Kuuro, owaabaire yaafiire, buzimazima yaagambire atyo. Omu mwanya mukye ebaruha kuruga aha mugabe wa Buperesi omusya eija. Egira ngu buzima kwo Kuuro akagira atyo. Aho omugabe ahandiika ati: ‘Murekye Abaisraeli bombekye hekalu ya Ruhanga waabo. Kandi nimbaragiira mubahwere.’ Omu myaka nk’ena hekalu ehwa kwombekwa, kandi Abaisraeli bashemererwa munonga.

Emyaka endiijo mingi ehinguraho. Hati hahweireho emyaka nka 48 okwiha obu hekalu yaahwa kwombekwa. Abantu omuri Yerusaalemu n’abooro kandi orurembo hamwe na hekalu ya Ruhanga tibirikureebeka gye. Ari omuri Babulooni, Ezera Omuisraeli amanya okwetenga okuriho ahabw’okuboneza hekalu ya Ruhanga. Mbwenu noomanya eki yaakozire?

Ezera aza kureeba Aruta-gizakiseesi, omugabe wa Buperesi, kandi ogu mugabe murungi aheereza Ezera ebiconco bingi kubitwara Yerusaalemu. Ezera ashaba Abaisraeli omuri Babulooni okumuhwera kwekorera ebi biconco kubitwara Yerusaalemu. Abantu nka 6,000 bagira ngu nibaija kugyenda. Baine efeeza nyingi n’ezaabu nyingi n’ebindi bintu bingi by’omuhendo eby’okutwara.

Ezera ayerarikiriire ahabw’okuba omu muhanda harimu abantu babi baingi. Aba bantu nibabaasa kubaaka efeeza n’ezaabu zaabo, kandi babaite. N’ahabw’ekyo, Ezera ateerana hamwe abantu, nk’oku orikureeba omu kishushani. Bashaba Yehova okubarinda omu rugyendo rwabo ruraingwa kugaruka Yerusaalemu.

Yehova kandi kwo abarinda. Bwanyima y’emyezi ena, bahika omuri Yerusaalemu bari buhooro. Eki tikirikworeka ngu Yehova naarinda abo abarikumwesiga arikubaheereza obuhwezi?

Ezera eshuura 2 okuhika 8.