Ekitebyo 98

Aha Kibungo kya Zeituuni

OGU ni Yesu aha kibungo kya Zeituuni. Abashaija bana abari nawe n’entumwa ze. Anderea na Petero n’eishe-emwe, kandi Yakobo na Yohaana nabo n’eishe-emwe. Egyo ei orikureeba hangahari ni hekalu ya Ruhanga omuri Yerusaalemu.

Hahingwireho ebiro bibiri okwiha obu Yesu yaataaha omuri Yerusaalemu ari aha ndogoya nto. Hati n’orwakabiri. Kareho omuri eryo izooba, Yesu akaba ari omuri hekalu. Okwo abanyamurwa bakagyezaho kumukwata kumwita. Kwonka bakatiina kukora eki ahakuba abantu nibakunda Yesu.

‘Imwe njoka ‘mwe, abaana b’encwera ‘mwe!’ Yesu nikwo yaayetsire atyo abeebembezi b’ediini. Bwanyima Yesu yaagira ngu Ruhanga akaba naaza kubafubira boona ahabw’ebintu bibi ebi baakozire. Bwanyima y’ekyo, Yesu akaza aha Kibungo Zeituuni, reero entumwa ze ezi ina zaatandika kumubuuza ebibuuzo. Noomanya ebi bariyo nibabuuza Yesu?

Entumwa ziriyo nizimubuuza aha bintu by’omu maisho. Nibamanya ngu Yesu naija kumaraho obubi bwona omu nsi. Kwonka nibenda kumanya obu eki kiribaho. Yesu naija kugaruka ryari okutegyeka nk’Omugabe?

Yesu naamanya ngu abakuratsi be omu nsi tibaribaasa kumureeba obu arigaruka. Eki n’ahabw’okuba aryaba ari omu iguru, kandi tibaribaasa kugaruka kumureeba ari okwo. N’ahabw’ekyo Yesu agambira entumwa ze bimwe aha bintu ebiriba nibibaho omu nsi obu ariba naateegyeka nk’Omugabe omu iguru. Bimwe ahari ebi bintu ni biiha?

Yesu agira ngu haryabaho okurangaanwa kw’entaro, ngu abantu baingi nibaija kurwara kandi bagire enjara, obugomi buryaba bubi munonga, ngu kandi haryabaho n’emitsitsa y’amaani. Kandi Yesu agira ngu amakuru g’obukama bwa Ruhanga garyabuurirwa hoona omu nsi. Ebintu ebi nitubireeba nibibaho omu bunaku bwaitu? Eego! N’ahabw’ekyo nitubaasa kuhamya ngu Yesu hati arikutegyekyera omu iguru. Jubajuba naija kumaraho obubi bwona omu nsi.

Matayo 21:46; 23:1-39; 24:1-14; Mako 13:3-10.