Ekitebyo 99

Omu Kishengye ky’Ahaiguru Omuri Kaanyinaibiri

HATI n’orwakana nyekiro, haahingwireho ebiro bibiri. Yesu n’entumwa ze 12 baija omu kishengye eki ekihango eky’ahaiguru okurya ekiihuro ky’Okuhingurwaho. Omushaija ou orikureeba naagyenda ni Yuda Iskaryota. Naaza kugambira abanyamurwa oku baraakwate Yesu.

Harikuburayo ekiro kimwe kyonka, Yuda akaza ei bari yaababuuza ati: ‘Nimwija kumpa ki ku ndabayambe okukwata Yesu?’ Baagira bati: ‘Ebicweka by’efeeza makumi ashatu.’ Mbwenu hati Yuda ariyo naaza kubugana abashaija abo kubatwara ahu Yesu ari. Ekyo t’ekintu kibi munonga?

Obugyenyi bw’Okuhingurwaho bwahwa. Kwonka hati Yesu yaatandika obundi bugyenyi bw’omutaano. Akwatsa entumwa ze omugaati, kandi agira ati: ‘Mugurye ahabw’okuba nigumanyisa omubiri gwangye oguraheebweyo ahabwanyu.’ Kandi abakwatsa egiraasi ya viinyo agira ati: ‘Munywe ahabw’okuba eki nikimanyisa eshagama yangye, eraasheesheke aha bwanyu.’ Baibuli eki neekyeta ‘Ekihuuro kya Mukama waitu.’

Abaisraeli bakaba barya Okuhingurwaho okubaijutsya obu maraika wa Ruhanga ‘yaahingura’ amaju gaabo omuri Misri, kandi akaita emijigaijo omu maju g’Abanyamisri. Mbwenu hati Yesu naayenda ngu abakuratsi be bamwijukye, n’oku yaahaireyo amagara ge ahabwabo. Egi niyo nshonga ahabw’enki naabagambira kukuza ekiro eki eky’omutaano buri mwaka.

Ku baaherize Ekiihuro kya Mukama waitu, Yesu yaagambira entumwa ze kuba emanzi kandi n’okuhama omu kwikiriza. Aha muheru baayeshongora ebyeshongoro by’okuhimbisa Ruhanga na bwanyima baashohora. Obwire hati bwagyenzire, shana zaahingwire nka shaaha mukaaga gw’ekiro. Reka tureebe ei barikuza.

Matayo 26:14-30; Luka 22:1-39; Yohaana eshuura 13 okuhika 17; 1 Abakorinso 11:20.