Ekitebyo 97

Yesu Okwija nk’Omugabe

OMWANYA mukye aherize kutambira empumi ibiri, Yesu akaza omu kaaro kakye haihi na Yerusaalemu. Yaagambira babiri aha beegi be ati: ‘Mugyende omu kyaro ekyo kandi nimwija kushangamu endogoya nto. Mugitsibure mugindetere.’

Endogoya ku bagimureetera, Yesu agishutamaho. Agyenda agishutamiho ataaha omuri Yerusaalemu ahatari hare n’aho. Ku airira haihi n’orurembo, omutwe muhango gw’abantu baija kumubugana. Baingi omuri bo bajuura ebijwaro byabo kandi babyaririka omu nguuto. Abandi batema amataagi g’emikindo. Aga nago bagaara omu nguuto kandi bagira bati: ‘Ruhanga ahe omugabe omugisha ogwo orikwija omu iziina rya Yehova!’

Iranaira omuri Israeli, abagabe basya bakaba bataaha omuri Yerusaalemu batembire aha ndogoya nto okweyoreka abantu. Eki nikyo Yesu ariyo naakora. Kandi abantu aba bariyo nibooreka ngu nibenda Yesu kuba omugabe waabo. Kwonka ti boona ngu nibamwenda. Nitubaasa kureeba eki turikwetegyereza ekyabaireho obu Yesu yaaza omuri hekalu.

Omu hekalu, Yesu atambira abantu abahumire n’abazingami. Abaana bato ku bareeba eki, bahimbisa Yesu. Kwonka eki kireetera abanyamurwa kwitwa ekiniga, batyo bagambira Yesu bati: ‘Noohurira ebi abaana barikugamba?’

Yesu abagarukamu ati: ‘Eego, nimbahurira. Imwe timukashomaga omu Baibuli ngu “Omu kanwa k’abaana bato Ruhanga aryaihamu okuhimbisibwa?”’ Kandi abaana baguma nibahimbisa omugabe wa Ruhanga.

Nitwenda kuba nk’abo baana, tikwo? Abantu bamwe nibabaasa kugyezaho kutuzibira kugamba n’abantu aha bukama bwa Ruhanga. Kwonka nitwija kuguma nitugambira abandi eby’okutangaaza ebi Yesu araije kukorera abantu.

Bukaba butari bunaku bwa Yesu okutandika kutegyeka nk’omugabe obu yaabaire akiri omu nsi. Eki nikiija kubaho ryari? Abeegi ba Yesu nibenda kumanya. Nituza kushoma ahari eki omu birikukurataho.

Matayo 21:1-17; Yohaana 12:12-16.