Ekitebyo 101

Yesu Okwitwa

REEBA ekintu kibi ekiriyo nikibaho! Yesu ariyo naitwa. Baamuta aha muti. Emisumaari yaateerwa omu ngaro ze n’omu bigyere bye. Ahabw’enki omuntu yaakwenzire kukora Yesu ati?

N’ahabw’okuba abantu abamwe nibanga Yesu. Noomanya abo abarikumwanga? Omwe ahari bo ni maraika omubi Sitaane, Omuregi. Niwe ogwo owaabaasize kureetera Adamu na Haawa kugomera Yehova. Kandi Sitaane niwe yaareetiire abazigu ba Yesu okukora ekintu kibi eki.

N’obu Yesu yaabaire atakahanikirwe aha muti, abazigu be bakamukora ebintu bibi. Noijuka oku baizire omu musiri gwa Gesesemaani n’oku baamutwaire? Abo bazigu bakaba bari baahi? Eego, bakaba bari abeebembezi b’ediini. Mbwenu, ka tureebe ekyakuratiireho.

Abeebembezi b’ediini ku baatwire Yesu, entumwa ze zikairuka zaahunga. Baareka Yesu wenka ari n’abazigu be, ahabw’okuba bakatiina. Kwonka Petero entumwa na Yohaana tibaragiire hare. Bakabakuratira kureeba ekiraabe ahari Yesu.

Abanyamurwa baatwara Yesu aha mushaija mukuru orikwetwa Ana, owaabaire ari omunyamurwa mukuru. Kwonka omutwe gw’abantu aba tibaragumire aha kumara omwanya muraigwa. Ekyakuratsireho batwara Yesu omu nju ya Kayaafa, hati ori omunyamurwa mukuru. Abeebembezi b’ediini baingi beteeraniire hamwe aha nju ye.

Aha omu nju ya Kayaafa bamuhozesa. Bareeta abantu kubeiherera Yesu. Abeebembezi b’ediini boona bagira bati: ‘Yesu ashemereire kwitwa.’ Batyo bamucwera amacwante aha maisho, kandi bamuteera entomi.

Ebintu ebi byona obu biba nibibaho, Petero aba aheeru omu kibuga. Ni nyekiro kandi hariho embeho, n’ahabw’ekyo abantu bahemba ekikoomi ky’omuriro. Ku baba niboota bari aha muriro, omuzaana ayetegyereza Petero, kandi agira ati: ‘Omushaija ogu nawe abaire ari na Yesu.’

Petero agarukamu ati: ‘Ngaaha mbaire ntari nawe!’

Emirundi eshatu abantu bagambira Petero ngu abaire ari na Yesu. Kwonka buri kugamba batyo, Petero agira ngu ti mazima. Petero ku agamba eki omurundi gwa kashatu, Yesu ahinduka amureeba. Petero ashaasha munonga ahabw’okugamba ebishuba, kandi agyenda arugaho arira munonga.

Eizooba ku ryatandikire kureebeka aha rwa Kataano omu kasheeshe, abanyamurwa batwara Yesu omu ishengyero, omu mwanya gwabo muhango ogu babugabuganiramu. Okwo bahanuura eki baraamukorere. Bamutwara owa Pontio Pilaato, omutegyeki w’eishaza rya Buyudaaya.

Abanyamurwa bagambira Pilaato bati: ‘Ogu n’omushaija mubi. Ashemereire kwitwa.’ Bwanyima y’okubuuza Yesu ebibuuzo, Pilaato agira ati: ‘Tindikureeba ekibi eki akozire.’ Bwanyima Pilaato ayohereza Yesu ahari Heroode Antipa. Heroode n’omugabe wa Galilaaya, kwonka naatuura omuri Yerusaalemu. Heroode nawe tarikureeba kibi eki Yesu akozire, n’ahabw’ekyo agaruka amwohereza ahari Pilaato.

Pilaato naayenda kurekura Yesu. Kwonka abazigu aba Yesu nibenda ondiijo musibe kuba niwe yaarekurwa. Omushaija ogu ni Barabba omwambuzi. Hati ziri nka shaaha mukaaga z’eihangwe, Pilaato ashohoza Yesu aheeru. Agira abantu ati: ‘Nimureebe! Omugabe waanyu!’ Kwonka abanyamurwa abakuru bagira bati: ‘Mutware! Aitwe! Aitwe!’ N’ahabw’ekyo Pilaato aikiriza arekura Barabba ayegyendera kandi batyo batwara Yesu kumwita.

Omu ihangwe ry’Orwakataano, Yesu ahanikwa aha muti. Torikubaasa kubareeba omu kishushani, kwonka ahari buri rubaju rwa Yesu hariho enkozi z’ebibi abarikuza kwitwa aha muti. Omwanya mukye Yesu atakafiire, omwe aha nkozi z’ebibi agambira Yesu ati: ‘Onyijukye ku orihika omu bukama bwawe.’ Na Yesu agarukamu ati: ‘Ninkuraganisa noija kuba naanye omu Kibanja kya Ruhanga.’

Okwo t’okuraganisa kurungi munonga? Noomanya ekibanja kya Ruhanga eki Yesu arikugambaho? Ekibanja kya Ruhanga eki yaakozire omu kubanza kikaba kirahi? Eego, kikaba kiri omu nsi. Kandi Yesu ku araategyeke nk’omugabe omu iguru, naija kuzoora ogu mushaija ashemerererwe amagara omu Kibanja kya Ruhanga ekisya omu nsi. Ekyo tikirikutushemeza?

Matayo 26:57-75; 27:1-50; Luka 22:54-71; 23:1-49; Yohaana 18:12-40; 19:1-30.