Ekitebyo 87

Yesu Omuto Omu Hekalu

REEBA ogwo mwojo muto orikugamba n’aba bashaija bakuru. N’abeegyesa omu hekalu ya Ruhanga omuri Yerusaalemu. Haza omwojo ni Yesu. Yaagyenda naakura. Hati aine emyaka 12 y’obukuru.

Abeegyesa baatangaara munonga okureeba Yesu naamanya bingi ahari Ruhanga hamwe n’ebihandiikirwe omu Baibuli. Kwonka ahabw’enki Yosefu na Mariamu bo batari aha? Bari nkahi? Ka twetegyereze.

Buri mwaka Yosefu naija n’eka ye omuri Yerusaalemu ahabw’obugyenyi bw’omutaano oburikwetwa Okuhingurwaho. N’orugyendo ruraingwa kuruga Nazareesi okuhika Yerusaalemu. Tihaine n’omwe oine emotoka, kandi tihariho egaari z’omwika. Zikaba zitariho omu biro ebyo. Abantu abarikukira obwingi nibagyenda aha bigyere, kandi nikibatwarira ebiro nka bishatu okuhika Yerusaalemu.

Omu bwire obu Yosefu aine eka mpango. N’ahabw’ekyo hariho barumuna na banyaanya ba Yesu abato ab’okureeberera. Mbwenu aha murundi ogu Yosefu na Mariamu baaza aha rugyendo ruraingwa n’abaana baabo kugaruka Nazareesi. Nibateekateeka ngu Yesu aine abantu abandi abu yaagyenda nabo. Kwonka omu mwabazyo ku beemerera, tibareeba Yesu. Bamusherurira omu banyabuzaare n’abanyamikago, kwonka ababurira! Batyo bagaruka Yerusaalemu okumusherurira okwo.

Bwanyima bashanga Yesu hanu ari n’abeegyesa. Arikubahurikiza kandi naababuuza ebibuuzo. Abantu boona batangaarira obwengye bwa Yesu. Kwonka Mariamu agira ati: ‘Mwana wangye, ahanki otugizire oti? Nyowe na sho tukusherwire twerarikiriire mononga.’

Yesu abagarukamu ati: ‘Mubaire nimunsherurira ki? Timurikumanya ngu nyine kuguma omu nju ya Tata?’

Eego, Yesu naakunda kuguma ahi arikubaasa kwega ebirikukwata ahari Ruhanga. Naitwe titushemereire kuhurira tutyo? Omuka owaabo Nazareesi, Yesu akaba naaza omu nteerane kuramya buri saabiiti. Ahabw’okuba akaba ahurikiriza, akeega ebintu bingi kuruga omu Baibuli. Ka tube nka Yesu kandi tukuratire eky’okureeberaho kye.

Luka 2:41-52; Matayo 13:53-56.