Okushenyagurika kw’Emeeri Aha Kirwa
Ekitebyo 112
Okushenyagurika kw’Emeeri Aha Kirwa
REEBA! obwato buri omu kabi! Buriyo nibushenyagurika! Nooreeba abantu abayetuura omu maizi? Abamwe baahikire aha nkungu. Ogwo niwe Paulo aho? Ka twetegyereze ekitwire nikimubaho.
Ijuka, okumara emyaka ebiri Paulo atwire asibiirwe omu Kaisarea. Bwanyima we n’abandi basibe bateebwa omu bwato, batyo batandika kugyenda nibaza Rooma. Ku baraba haihi n’ekirwa Kureete, eihunga ry’amaani ribateera. Omuyaga guhuuha n’amaani abashaija baremwa kuvuga obwato. Tibarikureeba eizooba nyomushana n’obu zaakuba enyonyoozi nyekiro. Aha muheru gw’ebiro bingi, boona ab’omu bwato bahwamu amatsiko g’okujunwa.
Paulo ayemerera agira ati: ‘Tihaine n’omwe oraafeerwe amagara ge; kureka obwato bwonka. Ahakuba nyekiro maraika wa Ruhanga aizire yaangira ati: “Paulo, otatiina; oshemereire kwemerera omu maisho ga Kaisaari omutegyeki wa Rooma; Kandi reeba Ruhanga naaza kukiza abo boona abarikugyenda naiwe.”’
Aha kiro kya 14 nk’omu itumbi bwanyima y’eihunga kutandika, abavugi b’obwato beetegyereza ngu amaizi nigeyeyongyera kuba magufu. Ahabw’okutiina kutomera ebibaare by’omu maizi omu mwirima, bashumya ebitsibo by’obwato ahansi. Omu kasheeshe bareeba enyambukiro. Bacwamu kugyezaho kuvuga obwato niborekyerera enkungu.
Mbwenu, ku bairiire haihi n’enkungu, obwato bwatomera ekikungu ky’omusheenyi butyo bwashaaya. Reero ebingonzi byatandika kubushenyagura, butyo obwato bwatandika kugangabukamu obucweka-cweka. Omukuru waabo nikwo kugira ati: ‘Mwena abarikumanya kuziha mubanze mwetuure omu maizi, muzihe muhikye aha nkungu. Abandi mwena mwetuuremu ahanyima yaabo, kandi mugyendere aha mbaho ezaruga aha bwato.’ Kandi eki nikyo baakozire. Omu muringo ogu boona abantu 276 abaabaire bari omu bwato bahika aha nkungu bari buhooro, nk’oku maraika yaaraganiise.
Ekirwa nikyetwa Melita. Abantu baamwo n’abanyambabazi, kandi bareeberera abo abaaruga omu bwato. Obwire ku bwakyeire gye, Paulo yaateebwa omu bundi bwato atyo yaatwarwa Rooma.
