Ekitebyo 108

Omu Ruguuto Rurikuza Damasiko

NOOMANYA ogwo obyami ahansi omwitaka? Ni Saulo. Ijuka, niwe yaareebereire ebijwaro by’abashaija abaateire Stefano amabaare. Reeba Omushana gw’amaani! N’enki ekiriyo nikibaho?

Sitefano ku yaaherize kwitwa, Saulo yaayebembera okuhiganisa abakuratsi ba Yesu okubakora kubi. Agyenda naaruga aha nju kuza aha ndiijo kandi abareeta, atyo abata omu kihome. Abeegi baingi bairuka bahunga baza omu ndembo ezindi batandika kurangiirira “amakuru marungi” okwe. Kwonka Saulo aza n’omu ndembo ezindi okusherura abakuratsi ba Yesu. Hati ari omu muhanda naaza Damasiko. Kwonka akiri omu muhanda, eki nikyo ky’okutangaaza ekyabaireho:

Ahonaaho, omushana ogurikuruga omu iguru gujwera Saulo gumwehinguririize. Agwa ahansi, nk’oku turikureeba aha. Bwanyima eiraka rigira riti: ‘Saulo, Saulo! Nompiigira ki?’ Abashaija abaabaire bari na Saulo nibareeba omushana kandi nibahurira eiraka kwonka tibarikwetegyereza ebirikugambwa.

Saulo abuuza ati: ‘Ori oha, Mukama wangye?’

Eiraka rigarukamu riti: ‘Niinye Yesu, ou orikwita kubi.’ Yesu agira atyo ahabw’okuba Saulo ku arikusaasa abakuratsi ba Yesu, Yesu naahurira orikushusha oti niwe barikusaasa.

Saulo hati abuuza ati: ‘Mukama wangye, nooyenda ngu ngire nta?’

Yesu agira ati: ‘Imuka oze Damasiko. Okwo noija kugambirwa eky’okukora.’ Paulo ku aimuka yaigura amaisho ge, tahweza kintu kyona. Manya yaahuma! N’ahabw’ekyo abashaija abari nawe bamukwata omukono bamuhitsya Damasiko.

Yesu hati agambira omwe aha bakuratsi be omuri Damasiko ati: ‘Anania, Imuka. Irooko oze omu muhanda ogurikwetwa Ogugororokire. Aha nju ya Yuda obuuze omushaija orikwetwa Saulo. Mmutoraine kuba omuheereza wangye ow’omutaano.’

Anania aikiriza. Ku abugana Saulo, amutaho engaro ze, kandi amugira ati: ‘Mukama yantuma ngu ohumuukye ogarukye oreebe kandi oijure omwoyo orikwera.’ Ahonaaho ebintu ebiri nk’ebikoko biruga aha maisho ga Saulo, ahumuuka agaruka areeba.

Saulo ayejunisibwa omu muringo gw’obushoboorozi okubuurira abantu b’amahanga maingi. Amanywa nk’entumwa Paulo ou turaije kwegaho bingi. Kwonka ka tureebe eki Ruhanga yaayohereize Petero kukora.

Ebyakozirwe 8:1-4; 9:1-20; 22:6-16; 26:8-20.