Ekitebyo 109

Petero Okutaayaayira Koruneelio

OGWO oyemereire aho n’entumwa Petero, kandi abo abamuri enyima ni bamwe ahari banywani be. Kwonka ahabw’enki ogwo mushaija nainamira Petero? Ashemereire kukora atyo? Nomumanya?

Omushaija ogwo ni Koruneelio. N’Omukuru w’abaserikare omu mahe ga Rooma. Koruneelio tarikumanya Petero, kwonka akagambirwa kumweta kwija omu nju ye. Reka tureebe oku eki kyabaireho.

Abakuratsi ba Yesu ab’okubanza bakaba bari Abayudaaya, kwonka we Koruneelio akaba atari Muyudaaya. Beitu naakunda Ruhanga, naamushaba kandi naakorera abantu eby’embabazi. Mbwenu, eizooba rimwe omu ihangwe, maraika amubonekyera amugira ati: ‘Ruhanga akushemerereirwe, kandi naija kugarukamu eshaara zaawe. Tuma abashaija beete omushaija orikwetwa Petero. Naatuura Yoopa omu nju ya Simooni, orikutuura aha rubaju rw’enyanja.’

Kare, ahonaaho Koruneelio atuma abashaija kweta Petero. Ekiro ekyakuratsireho, abashaija ku baabaire bari haihi kuhika Yoopa, Petero akaba ari aha mutwe gw’enju ya Simooni. Ari okwo, Ruhanga areetera Petero kuteekateeka ngu naareeba omwenda muhango gurishuuma kuruga omu iguru. Omu mwenda harimu enyamaishwa z’emiringo yoona. Okurugiirira aha mateeka ga Ruhanga, enyamaishwa ezi zikaba zitashemeire kuriibwa. Baitu eiraka rigira riti: Petero, Imuka. Oite orye!

Petero agarukamu ati: ‘Ngaaha! Tinkaryaga ebitashemeire!’ Kwonka eiraka rigambira Petero riti: ‘Eki Ruhanga yaashemeize otarikihindura ekirikuzira.’ Eki kibaho emirundi eshatu. Petero ku yaabaire ariyo akishobeirwe amakuru g’okworekwa okwo, abashaija abaatumirwe Koruneelio bahika aha nju kandi babuuza ei Petero ari.

Petero ashuuma abagira ati: ‘Niinye ou murikusherura. Mwahuutwa ki? Abashaija ku bamushobororera oku maraika agambiire Koruneelio kweta Petero kwija omu ka ye, Petero aikiriza kugyenda nabo. Ekiro ekyakuratsireho Petero na banywani be bagyenda kutaayaayira Koruneelio omuri Kaisarea.

Koruneelio yaaherize kuteerana hamwe abanyabuzaare na banywani be. Petero ku aija, Koruneelio amutangirira. Agwa ahansi aha bigyere bye, amwinamira nk’oku orikureeba. Kwonka Petero agira ati: ‘Imuka, naanye ndi omuntu nk’iwe! Eego, Baibuli neeyoreka ngu tikihikire okwinama kuramya omuntu. Tushemereire kuramya Yehova wenka.

Hati Petero abuurira abaabaire beeteeraine. Petero agira ati: ‘Naareeba ku Ruhanga arikwikiriza abantu boona abarikwenda kumuheereza.’ Ku aba naakigamba, Ruhanga abashukaho omwoyo orikwera, abantu batandika kugamba omu ndimi ezindi. Eki kitangaaza ab’eishe-emwe Abayudaaya abaizire na Petero, ahabw’okuba bakaba nibateekateeka ngu Ruhanga naakunda Abayudaaya bonka. Mbwenu eki kibegyesa ngu Ruhanga tashoroora mu nganda kugira ngu oruganda rumwe nirukuru ahari Ruhanga okukira ezindi nganda. Eki t’ekintu kirungi eki twena tushemereire kuguma nitwijuka?

Ebyakozirwe 10:1-48; 11:1-18; Okushuuruurwa 19:10.