Stefano Okuteerwa Amabaare
Ekitebyo 107
Stefano Okuteerwa Amabaare
OMUSHAIJA ogu otsimbire amaju ahansi ni Stefano. N’omwegyesibwa wa Yesu omwesigwa. Kwonka reeba ekirikubaho hati! Abashaija aba bariyo nibamuteera ebibaare. Ahabw’enki Stefano nibamwanga munonga kuhika aha kukora ekintu kibi munonga kityo? Reka tureebe.
Ruhanga atwire naahwera Stefano kukora eby’okutangaaza. Aba abashaija, eki tibarikukyenda, n’ahabw’ekyo batandika kumuhakanisa ahabw’okwegyesa abantu amazima. Kwonka Ruhanga aheereza Stefano obwengye bwingi, kandi Stefano ayoreka ku abashaija aba batwire nibeegyesa ebishuba. Eki kyongyera kubabiihiza. Batyo bamukwata, kandi beeta abantu kumubeiherera.
Omunyamurwa omukuru abuuza Stefano ati: ‘Ebyo nikwo biri bityo?’ Stefano agarukamu kurungi naababuurira naihirira omu Baibuli. Aha muheru gw’ebyo, agamba aha bantu ababi oku baayangire abarangi ba Ruhanga aba ira. Bwanyima agira ati: ‘Muri nk’abo bashaija. Mukaita Yesu omuheereza wa Ruhanga, kandi timurayorobeire mateeka ga Ruhanga.’
Eki kireetera abanyamurwa kugira ekiniga kingi! Banena amaino ahabw’ekiniga. Kwonka Stefano aimutsya amaisho ahaiguru abagira ati: ‘Reeba! Nindeeba Yesu ayemereire aha rubaju rwa Ruhanga orwa buryo omu iguru.’ Aho abashaija aba beekwata aha matu kandi barahukira Stefano. Bamukwata kandi bamukurura bamunaga aheru y’orurembo.
Aho bajuura ekooti zaabo baziha omutsigazi Saulo kuzirinda. Nooreeba Saulo? Kandi abashaija abamwe batandika kuteera Stefano amabaare. Stefano atsimba amaju ahansi nk’oku orikureeba, atyo ashaba Ruhanga ati: ‘Yehova otabatura ekibi eki.’ Stefano naamanya ngu bamwe omuri bo bahabisiibwe abanyamurwa. Bwanyima y’ebyo, Stefano afa.
Omuntu yaakukora ekintu kibi, naiwe noogyezaho kumukora kubi? Ninga nooshaba Ruhanga kubakora kubi? Ekyo tikyo Stefano yaakozire n’obu yaakuba Yesu. Bakaba baine embabazi n’ahari abo abaabaire batazibainiire. Reka tugyezeho kutooreza eky’okureeberaho kyabo.
