Ekitebyo 110

Timoseo—Omuhwezi wa Paulo Omusya

OGU mutsigazi ou orikureeba aha ari na Paulo ni Timoseo. Timoseo naatuura omu ka yaabo omuri Lisitura. Nyina naayetwa Yunike na nyinenkuru naayetwa Loisi.

Ogu n’omurundi gwa kashatu Paulo arikutaayaayira Lisitura. Nk’omwaka enyimaho, Paulo na Barunaba bakaijaho aha bari omu rugyendo rw’okubuurira. Mbwenu hati Paulo yaagaruka ari na munywani we Siila.

Noomanya eki Paulo ariyo naagambira Timoseo? Ariyo naamubuuza ati: ‘Nooyenda kugyenda naanye hamwe na Siila? Noobaasa kutuhwera omu kubuurira abantu omu myanya ya hare.’

Timoseo agarukamu ati: ‘Eego, niinyenda kugyenda naimwe.’ N’ahabw’ekyo bwanyima y’omwanya mukye, Timoseo atsigaho abaabo agyenda na Paulo na Siila. Kwonka tutakeegire ebirikukwata aha rugyendo rwabo, ka twetegyereze ebitwire nibiba ahari Paulo. Hahingwireho emyaka nka 17 okwiha obu Yesu yaamubonekyera omu muhanda gurikuza Damasiko.

Ijuka, Paulo akaija Damasiko okwita kubi abeegi ba Yesu, kwonka hati we wenka n’entumwa! Bwanyima abazigu baza omu naama y’okwita Paulo ahakuba tibarikukunda nyegyesa ye erikukwata ahari Yesu. Kwonka abeegi bahwera Paulo okutoroka. Bamuta omu kitukuru bamushohoza nibamurabya aha kisiika ky’orurembo.

Bwanyima Paulo aza omuri Antiokia kubuurira. Oku niyo ei abakuratsi ba Yesu baabandize kweterwa Abakristayo. Paulo na Barunaba booherezibwa kuruga omuri Antiokia omu rugyendo rw’okubuurira kuza omu nsi za hare. Emwe aha ndembo ezi baataayaayiire ni Lisitura, omuka owaaba Timoseo.

Hati, hahweireho omwaka gumwe, Paulo agaruka omuri Lisitura aha rugyendo rwe rwa kabiri. Obu Timoseo yaagyenda na Paulo na Siila, noomanya ei baagiire? Reeba ahari egyo maapu, haza twegye emwe aha myanya egyo.

Omu kubanza, baza haihi omuri Ikonio, bwanyima baza omu rurembo rwa kabiri orurikwetwa Antiokia. Okuruga aho, baza omuri Troa, bwanyima baza Filipi, Tesalonika na Beroya. Nooreeba Aseene ahari maapu? Paulo akabuurira okwo. Bwanyima y’ebyo bamara omwaka n’ekicweka nibabuurira omuri Korinso. Aha muheru bemereraho kakye omuri Efeso. Bwanyima baagaruka omu bwato burikuza Kaisarea, batyo baaza omuri Antiokia, ei Paulo arikutuura.

Timoseo agyenda ebigana n’ebigana bya mailo arikuhwera Paulo okubuurira amakuru marungi hamwe n’okutandikaho ebibiina by’Abakristaayo bingi. Ku oraabe waakuzire, noija kuba omuheereza wa Ruhanga omwesigwa nka Timoseo?

Ebyakozirwe 9:19-30; 11:19-26; eshuura 13 okuhika 17; 18:1-22.

[Map]

(Okureeba oku birikushoboororwa omu bigambo, reeba ekitabo)

Rooma

Melita

Tesalonika

Beroya

Korinso

Filipi

Aseene

Kureete

Troa

Efeso

Mileeto

Kolosai

Antiokia

Ikonio

Lusitura

Antiokia

Kupuro

Damasiko

Kaisarea

Yoopa

Yerusaalemu

ENYANJA EMPANGO (MEDITERRANEAN)