Abatsigazi Bana Omuri Babulooni
Ekitebyo 75
Abatsigazi Bana Omuri Babulooni
OMUGABE Nebukadeneeza atwara Abaisraeli boona abeegyesiibwe kurungi omuri Babulooni. Bwanyima omugabe atoorana omuri abo, abatsigazi abarikukirayo okwetegyereza n’okureebeka gye. Bana ahari aba nibo boojo abu orikureeba aha omu kishushani. Omwe ni Danieli, kandi bariya abandi bashatu Ababulooni nibabeeta Seduraaka, Mesaaki na Abedeneego.
Nebukadeneeza naateekateeka okutendeka abo batsigazi okumuheereza omu kikaari kye. Bwanyima y’emyaka eshatu ey’okutendekwa, naija kutooranamu abatsigazi bashatu bonka abarikukirayo kuba abanyabwengye okumuhwera omu kushoborora oburemeezi. Omugabe naayenda ngu aboojo aba bagire amaani n’amagara marungi baaba nibatendekwa. N’ahabw’ekyo aragiira abaheereza be kubaheereza boona eby’okurya birungi na viinyo ebi we n’eka ye barikuryaho.
Reeba omutsigazi Danieli. Noomanya eki arikugambira Ashipenazi omuheereza mukuru wa Nebukadeneeza? Danieli arikumugambira ngu we tarikwenda kurya eby’okurya birungi ebirugire aha meeza y’omugabe. Kwonka Ashipenazi yaayerarikirira kandi yaagira ati: ‘Omugabe abacwereireho ebi muraarye n’ebi muraanywe. Mbwenu ku muraabe mutareebekire gye nk’abandi batsigazi, naabaasa kunnyita.’
Bwanyima Danieli aza aha mugabuzi ou Ashipenazi ataireho kumureeberera we n’abagyenzi be bashatu. Amugira ati: ‘Ninkweshengyereza otugyeze, tumare ebiro 10 niturya ebihimba, kandi nitunywa amaizi. Haza bwanyima otushushanise n’abandi batsigazi abarikurya aha by’okurya by’omugabe, reero oreebe abarikureebeka gye kukira abandi.’
Omugabuzi aikiriza kukora eki. Kandi ebiro 10 ku bihwaho, Danieli n’abagyenzi be bashangwa nibareebeka kurungi okukira abandi batsigazi boona. N’ahabw’ekyo omugabuzi abaikiriza kuguma nibarya ebihimba omu mwanya gw’okurya eby’okurya by’omugabe.
Bwanyima y’emyaka eshatu, abatsigazi boona babatwara omu maisho ga Nebukadeneeza. Ku amara kugamba nabo boona, omugabe ashanga ngu Danieli n’abagyenzi be bashatu nibo barikukirayo kuba abanyabwengye. Atyo abatsigaza okumuhwera omu kikaari kye. Kandi omugabe buri kubuuza Danieli, Seduraaka, Mesaaki na Abedeneego ebibuuzo nari shi enshonga zigumire, nibabimanya emirundi 10 okukira abanyamurwa be nari abanyabwengye be.
