Ekitebyo 58

Daudi na Goliasi

ABAFILISTIA kandi bagaruka baija kurwanisa Israeli. Bakuru ba Daudi bashatu obwahati bari omu eihe rya Saulo. Mbwenu eizooba rimwe, Yese agambira Daudi ati: ‘Twara engano n’emigaati ogyemurire beene sho. Irooko oreebe oku bari.’

Daudi ku yaahikire aha rusiisira rw’eihe, yairuka yaaza aha rugamba okureeba bakuru be. Omufilistia rugambwa Goliasi aija kushungisa Abaisraeli. Atwire naakora eki buri kasheeshe na buri mwabazyo kumara ebiro 40. Agambira ahaiguru naagira ati: ‘Mutoorane omushaija omuriimwe aije andwanise. Ku araansingure yaanyita, niitwija kuba abahuuku baanyu. Kwonka ku ndamusingure naamwita, niimwija kuba abahuuku baitu. Nimbahiga nimmumpe omushaija turwane.’

Daudi abuuza bamwe aha baserikare ati: ‘N’enki ekiraaheebwe omushaija oraite ogu Mufilistia akaiha aha Baisraeli eki kijumo?’

Abo baserikare bamugarukamu bati: ‘Saulo naija kumutungisa, kandi naija kumuhingira omuhara kuba omukazi we.’

Kwonka Abaisraeli boona nibatiina Goliasi ahabw’okuba ni muhango munonga. Oburaingwa bwe ni nka fuuti 9 (mita 3) kandi aine n’ondiijo muserikare orikumwegurira engabo.

Bamwe aha baserikare bagyenda bagambira Omugabe Saulo ngu Daudi naayenda kurwanisa Goliasi. Kwonka Saulo agambira Daudi ati: ‘Torikubaasa kurwanisa ogu Mufilistia. Ori muto, kandi we atwire ari omuserikare ebiro by’amagara ge byona.’ Daudi amugarukamu ati: ‘Nkaita edubu n’ekicuncu ebyatwire entaama za tata. Kandi ogu Musfilista naija kuba nkazo. Yehova naija kuunyamba.’ N’ahabw’ekyo Saulo amugira ati: ‘Irooko, Yehova abe naiwe.’

Daudi ashuuma haihi n’omugyera kandi aihayo amabaare marungi ataano agata omu nshaho. Bwanyima atwara enjungu ye aza kubugabugana n’ekyo kikaaka. Goliasi ku amureeba, takiikiriza. Naateekateeka ngu nikiija kumurahukira okwita Daudi.

Goliasi amugira ati: ‘Ija nkubagire amahungu n’enyonyi bikurye.’ Kwonka Daudi we amugira ati: ‘Noonyizira oine rurara, eicumu, n’orubango, kwonka nyowe ninkwizira omu iziina rya Yehova. Eri izooba Yehova naija kukuhayo omu mikono yangye kandi niinyija kukwita.’

Aho Daudi airuka nairirira Goliasi. Aiha eibaare omu nshaho ye, arita omu njungu ye, kandi arirekyera n’amaani ge goona. Eibaare riteera Goliasi aha buso, atyo agwa ajumaire afa! Abafilistia ku bareeba ngu emanzi yaabo yaafa, bahinduka bairuka bahunga. Abaisraeli babarigitsa batyo baasingura orutaro.

1 Samueli 17:1-54.