Enshonga Ahabwaki Daudi Aine Kuhunga
Ekitebyo 59
Enshonga Ahabwaki Daudi Aine Kuhunga
BWANYIMA ya Daudi kwita Goliasi, mukuru w’amahe ga Israeli Abuneeri akamureeta omu maisho ga Saulo. Saulo yaashemerererwa Daudi munonga. Yaamuhindura omukuru w’amahe ge kandi yaamutwara kutuura omu nju y’omugabe.
Bwanyima, amahe ku gaarugire omu kurwanisa Abafilistia, abakazi bayeshongora bati: ‘Saulo aitsire enkumi kwonka Daudi yaita obukumi.’ Eki kyakwatsa Saulo eihari, ahabw’okuba Daudi akaheebwa ekitiinisa kingi okukira Saulo. Kwonka mutabani wa Saulo Yonasaani we tiyagira eihari. Naakunda Daudi munonga kandi na Daudi naamukunda munonga. Bombi baragaana ngu baryaguma bari ab’omukago.
Daudi n’omuteezi w’enanga murungi, kandi Saulo naakunda obweshongoro ebi arikuteera. Kwonka eizooba rimwe eihari rya Saulo rimureetera okukora ekintu kibi. Daudi ku yaabaire naateera enanga, Saulo yaihayo eicumu yarireekyera kumucumita naagira ati: ‘Niinyija kubamba Daudi aha kisiika!’ Kwonka Daudi yaryeshumba, eicumu ryacumita aha rubaju. Bwanyima Saulo yaagaruka yaagyezaho kucumita Daudi ogundi murundi n’eicumu rye. Atyo Daudi yaamanya ngu hati aine kwegyendesereza munonga.
Noijuka okuraganisa oku Saulo yaakozire? Saulo akagira ngu akaba naija kuheereza ogwo owaitsire Goliasi omuhara kuba omukazi we. Saulo aha muheru agambira Daudi ngu nabaasa kutwara omuhara Mikaali, kwonka ngu abanze aite Abafilistia abazigu 100. Teekateeka ahari ekyo! Saulo buzimazima akaba aine amatsiko ngu Abafilistia nibaija kwita Daudi. Kwonka tibarabaasize, kandi n’ahabw’ekyo Saulo aha Daudi omuhara kuba omukazi we.
Eizooba rimwe, Saulo agambira Yonasaani n’abaheereza be boona ngu naayenda kwita Daudi. Kwonka Yonasaani agambira ishe ati: ‘Otakaakora kubi Daudi. Tihaine kintu kibi eki arakukoreire. Kureka, buri kintu eki akozire kikuyambire munonga. Akata amagara ge omu kabi obu yaita Goliasi, kandi ku waakireebire waashemererwa.’
Saulo yaahurikiza eby’omutabani, kandi yaaraganisa ngu tarikwija kukora kubi Daudi. Daudi baamugarura, yaatandika kuheereza Saulo omu nju ye nk’omukubanza. Kwonka eizooba rimwe, Daudi ku yaabaire naateera enanga, Saulo kandi yaagaruka yaarekyera eicumu kwita Daudi. Daudi yaaryeshumba, kandi eicumu ryacumita ekisiika. Ogu n’omurundi gwa kashatu! Daudi yaamanya ngu aine kuhunga!
Ekiro ekyo Daudi yaaza omu ka owe. Kwonka Saulo yaatuma abashaija be okumwita. Mikaali naamanya eki ishe arikwenda kukora. N’ahabw’ekyo agambira iba ati: ‘Waaba otahungire eki kiro, nyencakare noija kwitwa.’ Ekyo kiro Mikaali yaahwera Daudi okuhunga arikurabira omu dirisa. Okumara emyaka mushanju, Daudi aine kweshereka omu mwanya etari emwe n’emwe kugira ngu Saulo ti yaamubona.
