Ekitebyo 74

Omushaija Otarikutiina

REEBA abantu bariyo nibashungisa ogu mutsigazi. Nomumanya? Ogu ni Yeremia. N’omurangi mukuru wa Ruhanga.

Omwanya mukye Yosia atandikire kucwekyereza ebishushani kuruga omu nsi egyo, Yehova akagambira Yeremia okuba omurangi we. Kwonka Yeremia naateekateeka ngu ni muto munonga okuba omurangi. Kwonka Yehova agira ngu Naija kumuhwera.

Yeremia agambira Abaisraeli okureka kukora ebintu bibi. Abagira ati: ‘Baaruhanga abu abantu b’amahanga barikuramya n’ab’ebishuba.’ Kwonka Abaisraeli baingi bakacwamu okuramya ebishushani omu mwanya gw’okuramya Yehova Ruhanga ow’amazima. Yeremia ku agambira abantu ngu Ruhanga naija kubafubira ahabw’obubi bwabo, bamushekyerera kwonka.

Emyaka ehinguraho. Yosia afa, kandi bwanyima y’emyezi eshatu, omutabani Yehoyakimu ahinduka omugabe. Yeremia aguma naagambira abantu ati: ‘Yerusaalemu neija kucwekyerezibwa ku muraabe mutahindwire aha mitwarize yaanyu mibi.’ Abanyamurwa bakwata Yeremia kandi bagambira ahaiguru bati: ‘Oshemereire kwitwa ahabw’okugamba ebintu ebi.’ Batyo bagambira abanyiginya ba Israeli bati: ‘Yeremia ashemereire kwitwa, ahabw’okuba arogotsire aha rurembo rwaitu.’

Mbwenu hati Yeremia naaza kukora ki? Tatiinire! Agambira boona ati: ‘Yehova antumire kubagambira ebintu ebi. Ku muraabe mutahindwire aha mitwarize yaanyu mibi, Yehova naija kuhwerekyereza Yerusaalemu. Kwonka mumanye kurungi eki: Ku muraanyite, nimwija kuba mwita omushaija otaine kibi ki akozire.’

Abanyiginya barekura Yeremia tibamwita, kwonka tibahindura aha mitwarize yaabo mibi. Bwanyima Nebukadeneeza, omugabe wa Babulooni, aija arwanisa Yerusaalemu. Aha muheru, Nebukadeneeza ahindura Abaisraeli kuba abaheereza be. Atwara enkumi n’enkumi omuri Babulooni. Teekateeka oku kirikushusha abantu abu otarikumanya okukwiha omuka owaanyu bakakutwara omu nsi ei otarikumanya!

Yeremia 1:1-8; 10:1-5; 26:1-16; 2 Abagabe 24:1-17.