Omwishiki Okuhwera Omushaija Rugambwa
Ekitebyo 69
Omwishiki Okuhwera Omushaija Rugambwa
NOOMANYA eki ogu mwishiki muto ariyo naagamba? Ariyo naagambira ogwo mukazi ebirikukwata aha murangi wa Yehova Elisa, hamwe n’ebintu by’okutangaaza ebi Yehova yaamuyambire kukora. Ogwo mukazi tarikumanya Yehova ahabw’okuba ti Mwisraelikazi. Mbwenu, ka tureebe, ahabw’enki ogu mwishiki ari omu maka g’omukazi ogu.
Omukazi ogwo n’Omusiria. Iba ni Naamani, omukuru w’eihe rya Siria. Abasiria bakakwata ogu mwishiki muto, reero baamureetera muka Naamani kuba omuheereza we.
Naamani aine endwara mbi erikwetwa ebibembe. Egi ndwara kandi hoona neebaasa kureetera omubiri gw’omuntu kucwekaho ebikcweka bimwe by’omubiri. N’ahabw’ekyo eki nikyo omwishiki arikugambira muka Naamani: ‘Nangwa mukama wangye kuri naaza ow’omurangi wa Yehova omuri Israeli. Akaamutambira ebibembe bye.’ Bwanyima ebi bigambirwa Iba w’ogu mukazi.
Naamani naayendera kimwe kukira; n’ahabw’ekyo acwamu kuza omuri Israeli. Ku ahikayo, aza aha nju ya Elisa. Elisa atuma omuheereza we kuza kugambira Naamani kunaaba omu mugyera Yorudaani emirundi mushanju. Eki kireetera Naamani kugira ekiniga kingi, kandi agira ati: ‘Emigyera y’owaitu omuka neehita buri mugyera gwona omuri Israeli!’ Bwanyima y’okugamba ebi, Naamani agarukayo.
Kwonka omwe aha baheereza be amugira ati: ‘Sebo, Elisa kuri yaakugambira kukora ekintu ekigumire, okaakikozire. Mbwenu hati ahabwaki otarikunaaba, nk’oku yaakugambira?’ Naamani ahurikiriza omuheereza we atyo agyenda ayedibika omu mugyera Yorudaani emirundi mushanju. Ku akikora, omubiri gwe gukwatana kandi gubonera!
Naamani ashemererwa munonga. Agaruka ahari Elisa kandi amugambira ati: ‘Hati nimmanya buzimazima ngu Ruhanga wa Israeli niwe Ruhanga wenka ow’amazima omu nsi yoona. Mbwenu naakweshengyereza, twara ekiconco eki kuruga ahariinye.’ Kwonka Elisa agarukamu ati: ‘Ngaaha, tindikwija kukitwara.’ Elisa naamanya ngu ni kibi okutwara ekiconco ahabw’okuba ni Yehova owaatambira Naamani. Kwonka omuheereza wa Elisa Gehazi naayeyendeza ekiconco eki.
N’ahabw’ekyo eki nikyo Gehazi akora. Bwanyima ya Naamani kugyenda, Gehazi airuka kumuhika. Gehazi agira ati: ‘Elisa yaanyohereza kukugambira ngu naayenda bimwe aha biconco byawe ahabwa banywani be abaija omuri aka kaanya kumutaayaayira.’ Kwonka buzimazima, eki n’ekishuba. Kwonka Naamani tamanya ngu n’ekishuba; n’ahabw’ekyo aheereza Gehazi bimwe aha bintu ebyo.
Gehazi ku ahika omuka, Elisa amanya eki yaaheza kukora. Yehova niwe yaamugambira. Atyo agira ati: ‘Ahabw’eki kintu kibi eki eki waakora, ebibembe bya Naamani nibiza kukuzaho.’ Kandi ahonaaho kiba nikwo kyaba!
N’enki eki turikubaasa kwega omuri ebi byona? Eky’okubanza, ni ngu tushemereire kuba nk’omwishiki ori omuto tugambe ebirikukwata ahari Yehova. Nikikora gye. Ekya kabiri, titushemereire kugira amaryo nk’oku Naamani yaabaire ari omu kubanza, kureka tushemereire kworobera abaheereza ba Ruhanga. Kandi ekya kashatu, titushemereire kubeiha nka Gehazi. Titurikwega bingi omu kushoma Baibuli?
