Ekitebyo 72

Ruhanga Okuhwera Omugabe Hezekia

NOOMANYA ahabw’enki ogu mushaija ariyo naashaba Yehova? Ahabw’enki yaarambika ezi baruha omu maisho g’itambiro rya Yehova? Omushaija ogwo ni Hezekia. N’omugabe w’obugabe bwa Israeli obw’enganda ibiri ez’omu mashuuma. Kandi ari omu kabi kahango. N’ahabw’enki?

N’ahabw’okuba eihe ry’Abasiria ryaherize kucwekyereza enganda 10 ez’omu omu matemba. Yehova aikiirize eki kubaho ahabw’okuba abantu abo babaire bari babi munonga. Kandi hati eihe ry’Abasiria ryaija kurwanisa obugabe bw’enganda ibiri.

Omugabe wa Asiria yaaheza kwoherereza Hezekia amabaruha. Ezi nizo baruha ezo ezi Hezekia yaata omu maisho ga Ruhanga. Ezo baruha nizishungisa Yehova, kandi nizigambira Hezekia okwereeza. Mbwenu egi niyo nshonga ahabwaki Hezekia yaashabire ati: ‘Ai Yehova, tujune kuruga aha mugabe wa Asiria. Obwo nibwo amahanga goona garimanya ngu niiwe Ruhanga wenka.’ Yehova naija kuhurira eshaara ya Hezekia?

Hezekia n’omugabe murungi. Tari nk’abagabe b’obugabe bwa Israeli obw’enganda 10, nari shi nk’ishe Ahazi Omugabe mubi. Hezekia atwire nayegyendesereza okworobera ebiragiro bya Yehova byona. N’ahabw’ekyo, Hezekia ku amara kushaba, omurangi Isaaya amwoherereza obutumwa oburikuruga ahari Yehova: ‘Omugabe wa Asiria tarikwija kutaaha omuri Yerusaalemu. Tihaine n’omwe aha baserikare be oraayirire haihi nayo. Tibarirasha n’obu gwakuba omwambi gumwe omu rurembo.’

Reeba eki kishushani aha rupapura oru. Noomanya aba baserikare boona abafiire? N’Abasiria. Yehova akoohereza maraika, kandi omu kiro kimwe maraika yaita abaserikare b’Abasiria 185,000. Atyo omugabe wa Asiria yaabirugaho, yaagaruka owaabo omuka.

Obugabe obw’enganda ibiri butyo bujunwa, kandi abantu bagira obusingye okumara akaanya. Kwonka bwanyima Hezekia ku afa, omutabani Manaase aba omugabe. Manaase n’omutabani Amoni owaamukuratiire bombi n’abagabe babi munonga. N’ahabw’ekyo ensi egaruka eijura obubi n’obutemu. Omugabe Amoni ku aitwa abaheereza be, omutabani Yosia aba omugabe w’obugabe obw’enganda ibiri.

2 Abagabe 18:1-36; 19:1-37; 21:1-25.