Ekitebyo 71

Ruhanga Okuraganisa Ekibanja Kye

EKI n’ekishushani eky’ekibanja kya Ruhanga nk’eki yaakuba yaayorekire omurangi we Isaaya. Isaaya akatuuraho omwanya mukye bwanyima ya Yona.

Ekibanja kya Ruhanga nikimanyisa “omusiri” nari “omwanya murungi gw’okuhuumuriramu.” Nikikwijutsya ekintu eki twaherize kureeba omu kitabo eki? Nikishushanira kimwe n’omusiri murungi ogu Yehova Ruhanga yaakoreire Adamu na Haawa, tikwo? Kwonka hariho obu ensi yoona eriba ekibanja kya Ruhanga?

Yehova akagambira omurangi we Isaaya okuhandiika ebirikukwata aha kibanja Kye ekisya ekirikwija ahabw’abantu ba Ruhanga. Akagira ati: ‘Emishega n’entaama biryatuura hamwe omu busingye. Enyana n’abaana b’ebicuncu biryariira hamwe, kandi omwana muto aryabireeberera. N’omwana muto tarihikwaho kabi ku arizaanira haihi n’enjoka y’obushegu.’

Baingi nibabaasa kugira ngu: ‘Eki tikirikubaasa kubaho! Hatwire hariho oburemeezi omu nsi, kandi buryaguma buriho.’ Kwonka kiteekateekyeho: Amaka agu Ruhanga yaahaire Adamu na Haawa, gakaba gari aga muringo ki?

Ruhanga akata Adamu na Haawa omu kibanja Kye. Ahabw’okugomera Ruhanga bakafeerwa amaka gaabo amarungi munonga, baakura kandi baafa. Ruhanga naaraganisa ngu naija kuheereza abarikumukunda ebintu ebyo ebi Adamu na Haawa baafeereirwe.

Omu kibanja kya Ruhanga ekirikwija, tihaine ekiraije kukora kubi nari kuhwerekyereza. Haryabaho obusingye obwa buzima. Abantu boona baryagira amagara marungi kandi bashemereirwe. Garyaba nk’oku Ruhanga yaabaire naayenda ngu gabe omu kubanza. Kwonka bwanyima nitwija kwega aha ku Ruhanga araije kureetaho eki.

Isaaya 11:6-9; Okushuuruurwa 21:3, 4.