Sulemaani Omugabe Omunyabwengye
Ekitebyo 63
Sulemaani Omugabe Omunyabwengye
SULEMAANI n’omutsigazi obu ahinduka omugabe. Naakunda Yehova, kandi naakuratira obuhabuzi burungi obu ishe Daudi yaamuhaire. Yehova naashemerererwa Sulemaani, n’ahabw’ekyo, ekiro kimwe amugira ati omu kirooto: ‘Sulemaani, n’enki eki orikwenda ngu nkuhe?’
Aho Sulemaani agarukamu ati: ‘Yehova Ruhanga wangye, ndi muto munonga kandi tindikumanya kutegyeka. N’ahabw’ekyo, mpa obwengye bw’okutegyeka abantu baawe omu buryo obuhikire.
Okwo kushaba kwa Sulemaani kushemeza Yehova. Atyo Agira ati: ‘Ahabw’okugira ngu waashaba obwengye kandi tiwashaba okuhangaara nari obugaiga, niinyija kukuha obwengye bwingi okukira omuntu weena orabaireho. Kandi niinyija n’okukuha ebi otaashaba, obugaiga hamwe n’ekitiinisa.’
Bwanyima y’omwanya mukye, abakazi babiri baija ahari Sulemaani n’enshonga egumire. Omwe aha bakazi agira ati: ‘Nyowe n’ogu mukazi nituraara omu nju emwe. Nkazaara omwana w’omwojo kandi bwanyima y’ebiro bibiri nawe yaazaara omwana w’omwojo. Reero ekiro kimwe omwana w’ogu yaafa. Kwonka ku naabaire mbyami ngwejegyeire, yaabyamya omwana we ofiire aha rubaju rwangye kandi yaatwara owangye. Ku naimukire kandi naareeba omwana ofiire, naashanga ku yaabaire atari wangye.’
Aho, ori omukazi ondiijo agira ati: ‘Ngaaha! Omwana ohuriire n’owangye, kandi ofiire n’owe!’ Omukazi ow’okubanza agarukamu ati: ‘Ngaaha! Omwana ofiire n’owaawe, kandi ohuriire niwe wangye!’ Oku nikwo abakazi baagumire nibahajaana. Sulemaani naaza kukora ki?
Atuma bamureetera ekisyo, kandi ku bakimureetera, agira ati: ‘Omwana ohuriire mumutememu kabiri, reero buri mukazi mumuhe ekicweka kimwe.’
Nyina w’omwana arira naagira ati: ‘Ngaaha! Naakweshengyereza mutakaita ogu mwana. Mumumuheereze!’ Kwonka omukazi ondiijo agira ati: ‘Ahariitwe mutagira ou mwamuha; mugyende omu maisho mumucwemu ebicweka bibiri.’
Aha muheru Sulemaani agira ati: ‘Mutakaita omwana ogwo! Mumuheereze omukazi ow’okubanza. Niwe nyina buzima.’ Sulemaani naamanya eki ahabw’okuba nyina w’omwana naakunda omwana munonga okuhika n’aha kwenda kumuheereza omukazi ori kugira ngu ataitwa. Abantu ku baahurira oku Sulemaani ashoboroire enshonga egi, bashemererwa ahabw’okugira omugabe w’obwengye.
Omu butegyeki bwa Sulemaani, Ruhanga aha abantu omugisha arikureetera eitaka kweza engano na sayiri, emizaabibu n’emizeituuni hamwe n’ebindi by’okurya. Abantu bajwara ebijwaro birungi kandi batuura omu maju marungi. Hariho ebintu birungi bingi ebirikumara buri omwe.
