Ekitebyo 67

Yehoshafaati Okwesiga Yehova

ABO bashaija nobamanya kandi noomanya eki bariyo nibakora? Nibaza omu rutaro, kandi abo bashaija abari omu maisho bariyo nibeeshongora. Kwonka noobaasa kubuuza: ‘Kandi shi ahabw’enki aba beeshongozi bataine bisyo n’amacumu eby’okurwanisa?’ Ka tureebe.

Yehoshafaati n’omugabe w’obugabe bwa Israeli obw’enganda ibiri. Naatuura omu bunaku bumwe n’Omugabe Ahabu na Yezebeeli ab’obugabe bw’enganda 10 obw’omu mashuuma. Kwonka Yehoshafaati n’omugabe murungi, kandi Asa ishe nawe akaba ari omugabe murungi. Okumara emyaka mingi abantu b’obugabe bw’omu mashuuma obw’enganda ibiri bari gye.

Kwonka hati hagira ekyabaho kireetera abantu kutiina. Entumwa ziija zigambira Yehoshafaati ziti: ‘Eihe rihango kuruga omu nsi ya Moabu, Amoni n’omu kibungo Seiri ririyo niryija kukurwanisa.’ Abaisraeli baingi beerundanira omuri Yerusaalemu okusherura obuhwezi bwa Yehova. Baza omu hekalu, kandi bari omwo, Yehoshafaati ashaba ati: ‘Ai Yehova Ruhanga waitu, titurikumanya eky’okukora. Titwine kihwera okurwanisa eri eihe rihango. Niiwe tutaireho amaisho okutuhwera.’

Yehova ahurira, kandi atuma omwe aha baheereza be okugambira abantu ati: ‘Orutaro tirwanyu, kureka n’orwa Ruhanga. Timurikwija kwetenga kurwana. Imwe mureebe kusha, kandi mureebe oku Yehova araabajune.’

N’ahabw’ekyo, omu kasheeshe akaakuratsireho, Yehoshafaati agambira abantu ati: ‘Mwesigye Yehova!’ Reero ata abeeshongozi omu maisho g’abaserikare, kandi bagyenda nibeshongora eby’okuhimbisa Yehova. Noomanya ekyabaireho bari haihi kuhika ahu orutaro ruri? Yehova areetera abaserikare abazigu okwerwanisa bonka. Kandi Abaisraeli ku bahikaho, bashanga buri muserikare omuzigu afiire!

Yehoshafaati tarakozire eky’obwengye okwesiga Yehova? Niitwija kuba ab’amagyezi naitwe ku turaamwesigye.

1 Abagabe 22:41-53; 2 Obusingye 20:1-30.