Ekitebyo 76

Yerusaalemu Yaacwekyerezibwa

HAAHINGWIREHO emyaka erikurenga omuri 10 okwiha obu Omugabe Nebukadeneeza yaatwara abatsigazi abarikukirayo obwegyese omuri Babulooni. Mbwenu hati reeba ekirikubaho! Yerusaalemu eriyo neyokibwa. Kandi Abaisraeli abataraitsirwe baatwarwa omuri Babulooni bari abasibe.

Ijuka, ngu eki nikyo abarangi ba Yehova baarangire ngu kikaba nikiija kubaho abantu ku baakwangire kuhindura aha mitwarize yaabo mibi. Kwonka Abaisraeli tibarahurikiize abarangi. Bakaguma nibaramya baaruhanga b’ebishuba omu mwanya gwa Yehova. N’ahabw’ekyo, abantu bashemereire kufubirwa. Nitumanya eki ahabw’okuba omurangi wa Yehova Ezekieli natugambira aha bintu bibi ebi Abaisraeli baabaire nibakora.

Ezekieli nomumanya? N’omwe aha batsigazi abu Omugabe Nebukadeneeza yaatwire omuri Babulooni emyaka erikurenga ahari 10 enyima okucwekyerezibwa kwa Yerusaalemu kutakabaireho. Danieli na banywani be bashatu Seduraaka, Mesaaki na Abedeneego, nabo bakatwarwa omu bunaku nibwo bumwe.

Ezekieli ku aba akiri omuri Babulooni, Yehova amworeka ebintu bibi ebirikukorerwa omu hekalu omuri Yerusaalemu. Yehova akora eki omu muringo gw’eky’okutangaaza. Ezekieli we buzima akiri omuri Babulooni, kwonka Yehova amubaasisa kureeba buri kintu kyona ekirikugyenda omu maisho omu hekalu. Kandi ebi Ezekieli yaareebire nibigwisa kubi!

Yehova agambira Ezekieli ati: ‘Reeba ebintu ebyo ebirikunugwa ebi abantu barikukora hanu omu hekalu. Reeba ebyo bisiika ebiijwire ebishushani by’enjoka n’ebindi eby’enyamaishwa. Kandi reeba abo Baisraeli abarikubiramya!’ Ezekieli naareeba ebintu ebi, kandi ahandiika byona ebirikukorwa.

Yehova abuuza Ezekieli ati: ‘Nooreeba ebi abakuru b’Abaisraeli barikukora omu kihama?’ Eego, ebi nabyo naabireeba. Hariho abashaija 70, kandi boona bariyo nibaramya baaruhanga b’ebishuba. Barikugira bati: ‘Yehova tarikutureeba. Atsigireho ensi.’

Bwanyima Yehova ayoreka Ezekieli abakazi aha irembo rya bukiizi-bwa-bumosho erya hekalu. Bashutami okwo nibaramya ruhanga w’ebishuba Tamuzi. Kandi reeba abo bashaija aha muryango gwa hekalu ya Yehova! Bari nka 25. Ezekieli abareeba. Barikwinamira burugwa-izooba kandi nibaramya eizooba!

Yehova agira ati: ‘Abantu aba tibarikumpa kitiinisa. Tibarikukora ebibi kwonka, kureka nibaija na hanu omu hekalu yangye babikoreramu! Atyo Yehova araganisa ati: ‘Nibaija kureeba ekiniga kyangye. Kandi tindibagirira saasi ku baraabe nibahwerekyerezibwa.’

N’emyaka nk’eshatu yonka ehingwireho Yehova aherize kworeka Ezekieli ebintu ebi obu Abaisraeli baagomera Omugabe Nebukadeneeza. N’ahabw’ekyo agyenda kubarwanisa. Bwanyima y’omwaka gumwe n’ekicweka, Ababulooni basheenya ebisiika bya Yerusaalemu kandi bookyeza kimwe orurembo. Abantu baingi baitwa kandi n’abandi batwarwa bari abasibe omuri Babulooni.

Ahabw’enki Yehova aikiriize okuhwerekyerezibwa oku kuhika aha Baisraeli? Eego, n’ahabw’okuba tibahurikiize Yehova kandi tiboorobeire biragiro bye. Eki nikyoreka oku kiri kikuru ahariitwe obutoosha okukora ebi Ruhanga arikugamba.

Omu kubanza, abantu bakye baikirizibwa kuguma omu nsi ya Israeli. Omugabe Nebukadeneeza ataho Omuyudaaya orikwetwa Gedalia okubeebembera. Kwonka bwanyima bamwe aha Baisraeli baita Gedalia. Hati abantu batiina ngu Abababulooni nibaza kwija babahwerekyereze boona ahabw’ekikorwa eki ekibi ekibaireho. N’ahabw’ekyo bagyema Yeremia okugyenda nabo batyo bahunga baza Misri.

Eki kireetera ensi ya Israeli kutsigara etarimu muntu n’omwe. Okumara emyaka 70 tihaine n’omwe orikutuura omu nsi egyo. Etsigara eri amatongo. Kwonka Yehova araganisa ngu naija kugarura abantu be omu nsi egyo bwanyima y’emyaka 70. Kwonka eki kitakabaireho, n’enki ekirikuhika aha bantu ba Ruhanga omuri Babulooni ei baatwirwe? Ka tureebe.

2 Abagabe 25:1-26; Yeremia 29:10; Ezekieli 1:1-3; 8:1-18.