Ekitebyo 66

Yezebeeli—Omugabekazi Omwinazi

BWANYIMA y’okufa kw’Omugabe Yeroboamu, buri mugabe orikutegyeka obugabe bwa Israeli obw’enganda 10 ez’omu matemba ni mubi. Omugabe Ahabu niwe mugabe mubi munonga okukira boona. Noomanya n’ahabw’enki? Enshonga emwe enkuru n’ahabw’omukazi we omwinazi, Omugabekazi Yezebeeli.

Yezebeeli ti Muisraelikazi. Ni muhara w’omugabe wa Sidoni. Naaramya Baali ruhanga w’ebishuba, kandi areetaire Ahabu hamwe n’abandi Baisraeli nabo kuramya Baali. Yezebeeli naayanga Yehova kandi naita abarangi be baingi. Abandi baine kweshereka omu nyanga z’amabaare kugira ngu bataitwa. Yezebeeli yaaba naayenda ekintu, naabaasa n’okwita omuntu okubaasa kukitunga.

Eizooba rimwe Omugabe Ahabu akagira obusaasi bwingi. Yezebeeli nikwo kumubuuza ati: ‘Ahabw’enki ogwirwe kubi eri izooba?’

Ahabu amugarukamu ati: ‘N’ahabw’eki Nabosi yaangambira. Naaba niinyenda kugura omusiri gwe ogw’emizaabibu. Kwonka yangira ngu tarikubaasa kugumpa.’

Yezebeeli amugira ati: ‘Otakaafayo, nyowe niinyija kugukuha.’

Atyo Yezebeeli ahandikira abakuru b’orurembo ei ogu mushaija Nabosi arikutuura. Abagira ati: ‘Muronde abashaija babiri abataine oku bari bagire ngu Nabosi yakyeena Ruhanga hamwe n’omugabe. Bwanyima mutware Nabosi aheeru y’orurembo, mumuteere amabaare afe.’

Yezebeeli ku amanya ati ngu Nabosi yaafa, agambira Ahabu ati: ‘Hati ija otware omusiri gwe ogw’emizaabibu.’ Torikwikiriza ngu Yezebeeli ashemereire kufubirwa ahabw’okukora ekintu kibi nk’eki?

Bwanyima, Yehova ayohereza omushaija Yehu okumufubira. Yezebeeli ku ahurira ngu Yehu ariyo naija, ayesiiga amaisho kandi agyezaho kwetona kugira ngu abonere. Kwonka Yehu ku aija areeba Yezebeeli ari omu dirisa, agambira abashaija b’omu kikaari ati: ‘Mumunagye ahansi!’ Abashaija bakuratira eki yaabagambira, nk’oku orikureeba aha omu kishushani. Bamunaga ahansi, kandi afa. Ogu nigwo muheru gwa Yezebeeli Omugabekazi mubi.

1 Abagabe 16:29-33; 18:1-4; 21:1-16; 2 Abagabe 9:30-37.