Ekitebyo 70

Yona Hamwe n’Eky’Enyanja Kihango

REEBA omushaija ori omu maizi. Ari omu kabi kahango, tikwo? Ekyo ky’enyanja kiri haihi kumumira! Ogu mushaija nomumanya? Eiziina rye ni Yona. Ka tureebe oku yaagwire omu kabi kahango katyo.

Yona n’omurangi wa Yehova. Tihakahweireho bwire bwingi bwanyima y’okufa kw’omurangi Elisa obu Yehova yaagambira Yona ati: ‘Irooko oze omu rurembo rwa Nineeve. Obubi bw’abantu baamwo ni bwingi munonga, kandi niinyenda kugamba nabo ahari bwo.

Kwonka Yona tarikwenda kuzayo. N’ahabw’ekyo, aza omu bwato oburikuza ahandi ahatari Nineeve. Yehova tashemerererwa okuhunga kwa Yona. Atyo Areeta eihunga ry’amaani. Riba ribi munonga rita obwato omu kabi k’okwenda n’okutobera. Ab’omu bwato batiina munonga, kandi batakira baaruhanga baabo kubahwera.

Aha muheru, Yona abagambira ati: ‘Nindamya Yehova, Ruhanga owaakozire eiguru n’ensi. Kandi ndiyo nimpunga kutakora eki angambiire kukora.’ N’ahabw’ekyo, ab’omu bwato bamubuuza bati: ‘Tukukore ki okucureeza eri ihunga?’

Yona abagira ati: ‘Munnagye omu nyanja haza enyanja neija kugaruka ecureere.’ Ab’omu bwato tibarikwenda kukora ekyo, kwonka eihunga ku riguma niryeyongyera kuba ribi, aha muheru banaga Yona omu nyanja. Ahonaaho omuyaga gurekyera aho, kandi enyanja etuuza.

Yona ku aba naakishuuma arikutobera omu maizi, eky’enyanja kihango kimumira. Kwonka tafa. Okumara ebiro bishatu nyomushana na nyekiro, Yona ari omu nda y’ekyo ky’enyanja. Yona ashaasha munonga ahabw’okugira ngu tarayorobeire Yehova okuza Nineeve. Mbwenu noomanya eki yaakozire?

Yona ashaba Yehova obuhwezi. Yehova areetera eky’enyanja okutanaka Yona aha nkungu. Bwanyima y’ebyo, Yona aza Nineeve. Eki tikirikutwegyesa oku kiri kikuru kukora buri ki Yehova arikutugambira?

Ekitabo kya Baibuli ekya Yona.