Ekitebyo 12

Abashaija Okwombeka Omunaara Muraingwa

EMYAKA mingi ekahinguraho. Batabani ba Noa baazaara abaana baingi. N’abaana baabo baakura baazaara abandi baingi. Omu bwire bukye hakaba hariho abantu baingi omu nsi.

Omwe ahari aba akaba ari mwijukuruzo wa Noa orikwetwa Nimuroodi. Akaba ari omushaija mubi owaabaire naahiiga kandi arikwita byombi enyamaishwa n’abantu. Nimuroodi kandi akeehindura omugabe kutegyeka abandi bantu. Ruhanga tarakunzire Nimuroodi.

Abantu boona omuri obwo bwire bakaba nibagamba orurimi rumwe. Nimuroodi akaba naayenda kubarundanira hamwe boona kugira ngu abaase kubategyeka. Mbwenu noomanya eki yaakozire? Akagambira abantu kwombeka orurembo hamwe n’omunaara muraingwa omu rurembo orwo. Bareebe omu kishushani barikukora amatafaari.

Yehova Ruhanga tarashemeziibwe okwombeka oku. Ruhanga akaba naayenda ngu abantu bajanjaare kandi batuure hoona omu nsi. Kwonka abantu bo baagira bati: ‘Ni mwije tweyombekyere orurembo n’omunaara, guhikye ahaiguru. Haza nitwija kurangaanwa!’ Abantu bakaba nibeyendeza ekitiinisa, batari kukyendeza Ruhanga.

Atyo Ruhanga yaayemereza abantu okwombeka omunaara. Noomanya oku yaakikozire? Akareetera abantu ahonaaho kugamba endimi zitarikushushana, omu mwanya gw’orurimi rumwe. Abombeki bakaba batakyetegyerezana. Egi niyo nshonga ahabwaki orurembo rwayetsirwe Babeeli nari Babulooni, ekirikumanyisa “Okubuzabuza.”

Abantu hati bakatandika kugyenda nibaruga omuri Babeeli. Ebigombe by’abantu abaabaire nibagamba orurimi rumwe baaza kutuura hamwe omu bicweka ebindi eby’ensi.

Okutandika 10:1, 8-10; 11:1-9.