Bakuru ba Yosefu Nibamwanga
Ekitebyo 21
Bakuru ba Yosefu Nibamwanga
REEBA omwojo ogu oku agwirwe kubi. Ni Yosefu. Bakuru be baaheza kumuguza aba bashaija abarikuza Misri. Okwo Yosefu naija kuhindurwa omuhuuku. Ahabw’enki beene ishe baakora ekintu kibi nk’eki? N’ahabw’okuba bainiire Yosefu eihari.
Ishebo Yakobo akaba naakunda Yosefu munonga munonga. Akamworeka ngu naamukunda obu yaamukorera ekanzu nungi ndaingwa. Bakuru be 10 ku baareebire oku Yakobo arikukunda Yosefu munonga, baatandika kugirira Yosefu eihari n’okumwanga. Kwonka hakaba hariho n’enshonga endiijo ahabwaki baabaire nibamwanga.
Yosefu akaroota ebirooto bibiri. Omu birooto bya Yosefu byombi, bakuru be bakaba nibamwinamira. Yosefu ku yaagambiire beene ishe ebirooto ebi, rwango yaabo ahari we yayeyongyera n’okukiraho.
Eizooba rimwe, bakuru ba Yosefu ku baabaire bariisize entaama z’ishebo, Yakobo yaatuma Yosefu okuza kureeba oku bari. Bakuru ba Yosefu ku baamureebire naija, bamwe ahari bo baagira bati: ‘Murekye tumwite!’ Kwonka Reubeeni, mukuru waabo yaabagira ati: ‘Ngaaha, mutakaakora ekyo!’ Omu mwanya gw’ekyo baakwata Yosefu baamunaga omu kiina kitarimu maizi. Batyo baashutama kucwamu eky’okumukorera.
Omu kaanya ako, hakaba hariho abashaija Abaishimaeli abaabaire nibahingura. Yuda yaagambira barumuna be ati: ‘Ka tumuguze aba Baishimaeli.’ Kandi ekyo baba nikyo baakora. Batunda Yosefu ebicweka by’efeeza 20. Ka kyabaire kiri ekikorwa ky’eitima kandi ekya rwango!
N’enki eki bakuru be baraagambire Ishebo? Baita embuzi kandi baaziringa ekanzu ya Yosefu enungi omu shagama y’embuzi. Bwanyima baatwarira ishebo Yakobo egyo kanzu kandi baamugira bati: ‘Tuboine egi kanzu. Gyetegyereze, oreebe yaaba etari kanzu ya Yosefu.’
Yakobo areeba ngu niyo. ‘Enyamaishwa eine kuba eitsire Yosefu,’ atyo arira. Kandi ekyo nikyo bakuru ba Yosefu barikwenda ngu ateekateekye. Yakobo agira amaganya maingi munonga. Acura kumara ebiro bingi. Kwonka Yosefu akaba atafiire. Ka tureebe ekiraamuhikyeho okwo ei yaatwarwa.
