Dina Okugwa omu Kabi
Ekitebyo 20
Dina Okugwa omu Kabi
NOOREEBA abu Dina arikuza kutaayaayira? Naaza kureeba bamwe aha baishiki abarikutuura omu nsi ya Kanaani. Eki kikaashemeize ishe ku yaakukihuriire? Okubaasa kugarukamu ekibuuzo eki, ijuka ebi Abrahamu na Isaaka baabaire nibateekateeka aha bakazi b’omuri Kanaani.
Abrahamu akaba naayenda omwana we Isaaka okushwera Omukanaanikazi? Ngaaha, akaba atarikukikunda. Isaaka na Rebeka, bo bakaba nibenda omwana waabo Yakobo kushwera Omukanaanikazi? Ngaaha, bakaba batarikwenda. Noomanya ahabwaki?
N’ahabw’okuba abantu aba ab’omuri Kanaani bakaba nibaramya baaruhanga b’ebishuba. Bakaba batari bantu barungi b’okushweramu, kandi bakaba batari barungi b’okunywana nabo. N’ahabw’ekyo nitubaasa kuhamya ngu Yakobo akaba atarikubaasa kushemererwa kureeba omuhara naanywana n’abaishiki b’Abakanaani.
Kitarikutangaaza, Dina akagwa omu kabi. Nooreeba ogwo mushaija w’Omukanaani omu kishushani oriyo naareeba Dina? Eiziina rye ni Shekemu. Eizooba rimwe, Dina ku yaagiire kutaayaaya, Shekemu akatwara Dina yaamuhamba. Eki kikaba kiri kibi, ahabw’okuba abashaija n’abakazi abashweraine nibo bashemereire kubyama hamwe. Ekintu kibi eki, eki Shekemu yaakozire ahari Dina kikongyera kureetaho oburemeezi.
Banyaanya ba Dina ku baakimanyire, bakagira ekiniga kingi munonga. Babiri ahari bo, Simeoni na Leevi, bakagira ekiniga kingi munonga baakwata zaarurara kandi baaza omu rurembo baagwa omu bashaija kitaraariire. Bo na barumuna baabo bakaita Shekemu n’abandi bashaija boona. Yakobo akaguubwa kubi ahabw’abatabani kukora ekintu kibi eki.
Oburemeezi obu bwona bukatandika buta? N’ahabw’okuba Dina akanywana n’abantu abaabaire batarikworobera ebiragiro bya Ruhanga. Naitwe titurikwenda kwija kunywana n’abantu nk’abo, tikwe?
