Ekitebyo 23

Ebirooto bya Faraho

EMYAKA ebiri ehinguraho, kandi Yosefu akiri omu kihome. Omugabuzi wa viinyo takamwijukire. Kwonka ekiro kimwe Faraho aroota ebirooto bibiri by’omutaano, kandi ashoberwa eki birikumanyisa. Noomureeba aho abyami? Omu kasheeshe akaakuratiireho, ayeta abanyabwengye be atyo abagambira ebi arootsire. Kwonka tibabaasa kumugambira amakuru g’ebirooto bye.

Mbwenuho omugabuzi wa viinyo aijuka Yosefu. Agambira Faraho ati: ‘Obu naabaire ndi omu kihome hakaba harimu omushaija owaabaire naabaasa kurootorora ebirooto.’ Faraho ahonaaho atuma bareeta Yosefu kuruga omu kihome.

Faraho agambira Yosefu ebirooto bye: ‘Ndeebire ente nungi mushanju ezigomokire. Bwanyima naagaruka naareeba ente mushanju embi ezihweire aha magufa. Kandi embi ezihweire aha magufa zaamira enungi ezigomokire.’

‘Omu kirooto kyangye kya kabiri, ndeebire ebishiisha by’engano mushanju birungi by’enjuma biri aha mushengye gumwe. Bwanyima ndeeba otushiisha mushanju otwomire. Kandi otushiisha otwomire tutandika kumira ebishiisha by’engano mushanju ebirungi.’

Yosefu agambira Faraho ati: ‘Ebirooto byombi nibishushana. Ente mushanju nungi ezigomokire n’ebishiisha birungi mushanju nibimanyisa emyaka mushanju, kandi ente mushanju ezihweire aha magufa n’otushiisha mushanju tw’engano otwomire nibimanyisa endiijo myaka mushanju. Nihaza kubaho emyaka mushanju ey’omweru omuri Misri. Bwanyima haryabaho emyaka mushanju obu haraabeho eby’okurya bikye munonga.’

N’ahabw’ekyo Yosefu agambira Faraho ati: ‘Ronda omuntu w’obwengye kandi omuhe obushoboorozi bw’okurundaana eby’okurya omu myaka mushanju y’omweru. Reero abantu tibarikuza kwitwa enjara omu myaka mushanju ey’enjara eraakurateho obu haraabe hariho eby’okurya bikye munonga.’

Faraho akunda ekiteekateeko eki. Kandi aronda Yosefu okurundaana eby’okurya, n’okubihunika. Yosefu aba omukuru wa kabiri ahari Faraho omuri Misri.

Bwanyima y’emyaka munaana, omu bunaku bw’enjara, Yosefu areeba abashaija nibaija. Noomanya bakaba bari baahi? Ka nibakuru be 10! Ishebo Yakobo abatumire Misri ahabw’okuba bakaba bahweisize eby’okurya omuka owaabo Kanaani. Yosefu amanya bakuru be aba kwonka bo tibamumanya. Noomanya ahabw’enki? N’ahabw’okuba Yosefu hati ni mukuru, kandi ajwaire ebijwaro by’omuringo ogundi.

Yosefu aijuka ngu obu yaabaire akiri muto, akaroota bakuru be barikwija kumwinamira. Noijuka orikushoma ekyo? Atyo Yosefu naareeba ngu Ruhanga niwe yaamwohereize Misri, ahabw’enshonga nungi. Nooteekateeka ngu Yosefu akakora ki? Ka tureebe.

Okutandika 41:1-57; 42:1-8; 50:20.