Ekitebyo 24

Yosefu Okugyeza Bakuru Be

YOSEFU naayenda kumanya yaaba bakuru be 10 bakiine eihari n’omutima gutaine mbabazi. N’ahabw’ekyo agira ati: ‘Muri entatsi. Mwizire kureeba ai ensi yaitu etaine maani.’

Bagarukamu bati: ‘Ngaaha, tituri ntatsi. Turi abantu b’amazima. Twena turi eishe-emwe. Tukaba turi 12. Kwonka murumuna waitu omwe takiriho, kandi omuto atsigaire omuka na tataitwe.’

Yosefu ayehindura nk’otaikiriza ebi barikugamba. Atsigaza mukuru we orikwetwa Simeoni omu kihome, kwonka aikiriza abandi kugarukayo kutwara eby’okurya. Kwonka abagambira ati: ‘Ku muraabe nimugaruka, nimuragirwa kwija na murumuna wanyu omuto.’

Ku baagarukire omuka owaabo Kanaani, baagambira Ishebo Yakobo byona ebyabaireho. Yakobo yaaguubwa kubi munonga. Yaatonzya naagira ati: ‘Yosefu takiriho, kandi hati na Simeoni nawe ngugwe takiriho! Tindikuza kwikiriza bucura bwangye Benyamiini kugyenda naimwe.’ Kwonka eby’okurya ku byatandikire kubahwaho, Yakobo yaabaikiriza kugyenda na Benyamiini Misri kugira ngu bareeteyo ebindi by’okurya.

Mpaho Yosefu areeba bakuru be nibaija. Ashemererwa munonga okureeba omurumuna Benyamiini. N’eky’amazima, tihaine n’omwe omuri bo orikumanya ngu ogu mushaija w’ekitiinisa ni Yosefu. Hati Yosefu akora ekintu kugyeza beene ishe 10.

Agambira abaheereza be okwijuza enshaho zaabo n’eby’okurya. Kwonka bo batarikukimanya, aragiira ku bata ekikopo kye ky’omutaano eky’efeeza omu nshaho ya Benyamiini. Bwanyima y’okugyendaho akagyendo kakye, Yosefu atuma abaheereza be kubakurata. Ku baabahikire, abaheereza baabagira bati: ‘Ahabw’enki mwibire ekikopo kya mukama waitu eky’efeeza?’

Beene ishe boona bagira bati: ‘Titwibire kikopo kye. Ku murashangye kiinwe omwe ahariitwe, ogwo aitwe.’

Batyo abaheereza batandika kusherura omu nshaho zaabo zoona, kandi bashanga ekikopo ekyo omu nshaho ya Benyamiini nk’oku orikureeba aha. Abaheereza bagira bati: ‘Abandi mwena mugyende, kwonka Benyamiini naaragiirwa kugarukayo naitwe.’ Mbwenu beene ishe 10 nibaza kukora ki hati?

Boona bagarukayo na Benyamiini omu nju ya Yosefu. Yosefu agambira bakuru be ati: ‘Mwena mugyende mugarukye owaanyu, kwonka Benyamiini naaza kuguma aha nk’omuhuuku wangye.’

Yuda nikwo kugamba naagira ati: ‘Ku ndaagarukye omuka ntaine mwojo ogu, tataitwe naija kufa ahabw’okuba naamukunda munonga. Nakweshengyereza, ka mbe niinye naaguma aha nk’omuhuuku waawe, kwonka oikirize omwojo agarukyeyo omuka.’

Yosefu naareeba ngu bakuru be hati bahindukire. Tibakiine eihari na rwango. Ka twetegyereze eki Yosefu araakore hati.

Okutandika 42:9-38; 43:1-34; 44:1-34.