Ekibanja kya Ruhanga omu Nsi

Yehova naija kumariraho kimwe obubi bwona obwaretsirweho Sitaane. Yehova akahindura Yesu Omugabe w’ensi yoona. Omu butegyeki bwe, ensi neija kuhinduka ekibanja kya Ruhanga.—Danieli 7:13, 14; Luka 23:43.

Yehova naaraganisa ebintu ebi:

EBY’OKURYA BINGI: ‘Ensi eryareeta omweru gwayo; Ruhanga waitu aryatuha emigisha.’ “Haryabaho omweru mwingi omu nsi, emyaka eryakondakonda omu misiri [n’]omu bibungo.”—Zaaburi 67:6; 72:16.

TIHARIBAHO NGAMBA BUNDI: “Mwije mureebe emirimo ya MUKAMA, oku areetsire okuhwerekyerera omu nsi. Amaraho engamba okuhika aha muheru gw’ensi; ahenda amata, amacumu agatemamu kabiri; n’ebigaari abyotsya n’omuriro.”—Zaaburi 46:8, 9.

TIHARIBAHO BANTU BABI: “Mumanye ngu ababi baryacwekyerezibwa; . . . Bwanyima y’akaanya kakye omubi aryaba atakiriho; buzima oryamusherura aha mwanya gwe, oshangye atariho.”—Zaaburi 37:9, 10.

 TIHARIBAHO KURWARA, AMAGANYA, NARI OKUFA: “Obwo amaisho g’empumi garyahumuurwa, n’amatu g’ebifa-matu garyaigurwa; ekirema kiryaguruka nk’empara, n’orurimi rw’ekiteta rweshongore ahabw’okushemererwa.”—Isaaya 35:5, 6.

“[Ruhanga] we wenka aryaguma nabo, . . . aryaragaza amarira goona aha maisho gaabo; tiharibaho kufa bundi, n’obu kwakuba okucura nari okurira nari obusaasi, ahakuba ebya ira biryaba bihweireho.”—Okushuuruurwa 21:3, 4.

Obutashushana na Sitaane na baadaimoni be, Yehova tabeiha. Buri kintu kyona eki araganisa kihikiirira. (Luka 1:36, 37) Yehova naakukunda kandi naayenda ngu otuure omu Kibanja Kye eki arikwija kureetaho. N’ahabw’ekyo hikiirira Abajurizi ba Yehova obaase kwega amazima agarikushangwa omu Kigambo kya Ruhanga. Ku oraagyendere aha mazima aga omu magara gaawe, noija kukomoororwa kuruga omu bukwatwa bw’ebishuba, obw’emigyenzo etahikire n’obutamanya. Bwanyima, noija n’okukomoororwa kuruga omu kibi n’okufa. Nk’oku Yesu yaagambire: ‘Oryamanya amazima, n’amazima garyakuhindura ow’obusingye.’—Yohaana 8:32.