Emyoyo ti Bantu Abaatwireho omu Nsi Bwanyima Bakafa

Emyoyo eriho! Omu butuuro by’emyoyo ahatarikureebwa, hariyo emyoyo emirungi n’emibi. Tugire ngu shi emyoyo egi n’abantu abaatwireho omu nsi bwanyima bakafa?

Ngaaha, tibaribo. Omuntu ku arikufa, we tarikwambuka kuza omu butuuro by’emyoyo, nk’oku baingi barikuteekateeka. Eki nitukimanya tuta? N’ahabw’okuba Baibuli nikwo erikugira. Baibuli n’ekitabo ky’amazima agarikuruga ahari Ruhanga omwe wenka ow’amazima, ou eiziina rye ari Yehova. Yehova akahanga abantu; naamanya gye ekirikubaho ku barikufa.—Zaaburi 83:18; 2 Timoseo 3:16.

Baibuli neegira ngu Ruhanga akahanga Adamu, omuntu w’okubanza, kuruga omu “mucuucu gw’ahansi.” (Okutandika 2:7) Ruhanga akamuta omu Kibanja Kye, nigwo musiri gw’omuri Edeni. Adamu kuri yaayorobeire ekiragiro kya Yehova, akaba atarikwija kufa; n’eri izooba, akaabaire akiriho omu nsi. Kwonka Adamu ku yaagomiire ekiragiro kya Ruhanga akigyendereire, Ruhanga yaamugira ati: ‘Oryagaruka omwitaka, ahakuba nimwo waihirwe; ahabw’okuba ori omucuucu, n’omu mumucuucu nimwo origaruka.’—Okutandika 3:19.

Eki nikimanyisa ki? Haza shi, Adamu akaba ari nkahi obu Yehova yaabaire atakamuhangire kuruga omu itaka? Tihaine au yaabaire ari. Akaba atari kihangirwe ky’omwoyo omu iguru. Akaba atariho. N’ahabw’ekyo, obu Yehova yaagira ngu Adamu akaba ‘naija kugaruka omwitaka,’ akaba naamanyisa  ngu Adamu naija kufa. Tarayambukire kuza omu butuuro bw’emyoyo. Aha kufa, Adamu akagaruka yaaba otaine magara, otariho. Okufa nikimanyisa okutagira magara.

Kandi shi abandi abafiire? Nabo tibariho? Baibuli negarukamu:

“Byona [abantu n’emyamaishwa] biza omu mwanya gumwe; byona bikaruga omu mucuucu, kandi byona nimwo birigaruka.”—Omubuurizi 3:20.

“Abafiire tibagira ki bamanya.”—Omubuurizi 9:5.

“Okukunda kwabo n’okwangana kwabo n’eihari ryabo, byona biba byahweireho.”—Omubuurizi 9:6.

“[Okuzimu] tihabayo murimo, nari enaama, nari okumanya n’obu bwakuba obwengye.”—Omubuurizi 9:10.

“[Omuntu] agaruka omu itaka; eryo izooba ebiteekateeko bye bihwaho.”—Zaaburi 146:4.

 Ebyahandiikirwe ebi nooshanga bigumire kwetegyereza? Ku kiraabe kiri kityo, teekateeka ahari eki: Omu maka maingi, omushaija niwe arikukora okutunga esente z’okubaisaho eka ye. Omushaija ogu ku arikufa, obutoosha eka ye neebonabona. Obumwe omukazi we n’abaana be nibabura esente z’okugura eby’okurya. Obundi abazigu b’omushaija ogu nibatandika kubakora kubi. Hati mbwenu yebuuze: ‘Omushaija ogwo ku araabe naaba ari omu butuuro bw’emyoyo ahuriire, ahabw’enki atarikugumizamu kureeberera eka ye? Ahabw’enki atarikurinda eka ye kuruga aha abantu aba ababi?’ N’ahabw’okuba ebyahandiikirwe bihikire. Omushaija ogwo naaba ataine magara, atarikubaasa kugira eki yaakora kyona.—Zaaburi 115:17.

Eki shi nikimanyisa ngu abafiire tibarigaruka kuba abahuriire? Ngaaha, tikirikumanyisa ekyo. Nitwija kugamba aha kuzooka bwanyima. Kureka nikimanyisa ngu abafiire tibarikumanya ebi orikukora. Tibarikubaasa kukureeba, kukuhurira, nari kugamba naiwe. Toshemereire kubatiina. Tibarikubaasa kukuhwera, kandi tibarikubaasa kukukora kubi.—Omubuurizi 9:4; Isaaya 26:14.

[Ekishushani ekiri aha rupapura 4]

Adamu akaruga omu mucuucu, akagaruka omu mucuucu

[Ebishushani ebiri aha rupapura 5]

Abahuriire bonka nibo barikubaasa kukora ebintu ebi

[Ebishushani ebiri aha rupapura 6]

Abafiire tibarikubaasa kuhwera abaine enjara nari okurinda abarikubonabonesibwa