Enturukiriro

“Nkakurira omu kaaro kakye omu kyanga ky’omu matemba ga Sierra Leone,” ati Dauda nikwo arikushoborora. “Eizooba rimwe, nkiri muto, hakabaho empaka, eka yaitu hamwe n’endiijo zirikutonganira eitaka. Eka ezi zombi, buri emwe ekaba neegira ngu eitaka n’eryayo. Okubaasa kushoborora enshonga egi, bakeeta omufumu. Yaaheereza ondiijo mushaija endeberwamu, reero yaamutwekyerera omwenda gurikwera. Ahonaaho omushaija owaabaire ari omu mwenda yaatandika kutetema n’okutuutuka. Arikureeba omu ndeberwamu, akagamba n’eiraka rihango ati: ‘Nnindeeba omugurusi naija! Ajwaire emyenda erikwera. Ni muraingwa kandi n’omugurusi, aine enju kandi naagyenda ayinami.’

“Akaba naashoborora enshusha ya Tatenkuru! Bwanyima akatiina munonga kandi n’eiraka rihango yaagira ati: ‘Ku muraabe mutarikwikiriza ebi ndikubagambira, mwije mwereebere!’ Buzima, tihaine n’omwe omuriitwe owaabaire aine obumanzi kukora ekyo! Omufumu akamucureeza arikumumiisirira emibazi y’ekishaka ejwangize omu maizi, ebi yaabaire aine omu kasisi.

“Arikugambira omu mushaija w’omu ndeberwamu, ‘Tatenkuru’ akagira ngu eitaka rikaba riri ery’eka yaitu. Akagambira maawenkuru ngu ashemereire kurihinga ataine kwerarikirira kwona. Eka eri endiijo ekaikiriza ebi ebyarugiremu. Enshonga yaashobororwa.”

 Ebintu nk’ebi nibikira kubaho omuri Afrika ey’omu Burengyerwa-izooba. Kunu, nk’oku kiri omu bindi bicweka by’ensi, enkumi n’enkumi z’abantu nibaikiriza ngu abafiire nibagumizamu baza omu butuuro bw’emyoyo, ei barikubaasiza kwetegyereza kandi bakagira n’eki baakora aha magara g’abantu abari omu nsi. Enyikiriza egi noogira ngu ehikire? Buzimazima noogira ngu abafiire bahuriire? Ku baraabe batahuriire, kandi shi ni baahi abo abarikwetwara kuba emyoyo y’abo abafiire? Ni kikuru munonga okumanya eby’okugarukamu ebihikire eby’ebibuuzo ebi. Egi n’enshonga y’okufa n’okukira.