Heereza Yehova, Beitu Atari Sitaane

Twena twine kwecweramu. Yaaba kuheereza Yehova nari Sitaane na baadaimoni be. Titurikubaasa kuheereza bombi. Ka n’eky’obwengye okuheereza Yehova!

Yehova ni Murungi

Nk’oku twaheza kureeba, baadaimoni nibashemerererwa okusaasa n’okubeiha abantu. Yehova we tikwo ari. Naakunda abantu nk’oku omuzaire akunda abaana be. Niwe Aheereza “engabirano yoona enungi n’ekiconco kyona ekihikire.” (Yakobo 1:17) Tihaine ekirungi eki arikwima abantu, n’obu kyakuba kiri eky’omuhendo munonga ahari we.—Abaefeso 2:4-7.

Teekateeka aha bintu ebi Yesu, Omwana wa Ruhanga yaakozire ari omu nsi. Akagambisa ebiteta yaahumuura n’empumi. Akatambira abarema n’ababembe. Akabinga baadaimoni kandi yaatamba n’endwara zoona. Ahabw’amaani ga Ruhanga, Yesu akazoora abafu.—Matayo 9:32-35; 15:30, 31; Luka 7:11-15.

Omu mwanya gw’okugamba ebishuba ebirikutuhabya, obutoosha Ruhanga naagamba amazima. Tarikubaasa nakakye kubeiha omuntu weena.—Okubara 23:19.

 Yetantare Ebikorwa Ebibi

Nk’oku orububi rw’orutangura rurikuzingirira enshohera rukahamya, nikwo n’abantu baingi bakwatsirwe emigyenzo n’enyegyesa z’ebishuba. Nibatiina abafu. Batiina baadaimoni. Nibatiina emikyeeno, endagu, amarogo hamwe n’emiguruko. Bakomirwe enyikiriza n’emigyenzo ebirikukomooka aha bishuba by’Omuregi Sitaane. Abaheereza ba Ruhanga tibarikutiinatinisibwa n’obu kyakuba kimwe ahari ebi.

Yehova aine amaani maingi munonga okukira Sitaane. Waaheereza Yehova, naija kukurinda baadaimoni. (Yakobo 4:7) Emandwa tizirikwija kutusaasa. Eky’okureeberaho: Omuri Nigeria, abafumu b’amaani bashatu bakoohereza emandwa ngu ziite Omujurizi wa Yehova owaabaire ayangire kuruga omu rurembo orwo. Emandwa ku zaaremirwe kumwita, omwe aha bafumu yaatiina, yaaza aha Mujurizi wa Yehova atyo yaamweshengyereza ngu amusaasire.

Baadaimoni ku baraakuteganise, yeta Yehova omu eiziina rye kandi naija kukurinda. (Enfumu 18:10) Kwonka iwe okubaasa kutunga oburinzi kuruga ahari Ruhanga, oine kwetantarira kimwe ekintu kyona ekiine akakwate n’emizimu nari okuramya baadaimoni. Abaramya ba Ruhanga omuri Efeso nikyo baakozire. Bakateeranira hamwe ebitabo byabo eby’okuragura baabyotsya. (Ebyakozirwe 19:19, 20) Abaheereza ba Ruhanga nabo hati nikwo baine kukora. Yetantarire kimwe eby’oburogi, engisha, ebitabo by’obufumu n’ebindi bintu byona ebikwatiraine n’ebikorwa by’obufumu.

 Ramiza omu Diini ey’Amazima

Waaba nooyenda kushemeza Ruhanga, okureka okuramya okutahikire n’okureka kukora ebintu bibi, kyonka tikirikumara. Oine kukyoreka omu bikorwa orikuza omu kuramya okw’amazima. Baibuli neeyoreka eki turikwetenga kukora:

 Teerana Hamwe n’Abajurizi ba Yehova

Sitaane na baadaimoni be baine abantu baabo omu nsi abarikukora kandi bakegyesa ebintu bibi. Na Yehova aine abantu be. Nibeetwa Abajurizi ba Yehova. (Isaaya 43:10) Omu nsi yoona, nibarenga aha bukaikuru mukaaga. Abajurizi ba Yehova boona nibagyezaho munonga kukora ebintu ebirungi n’okwegyesa abantu amazima. Omu mahanga maingi, nobashanga aha Kyombeko ky’Obukama, ei baraije kukwakiira n’okushemererwa.

Omurimo gwabo n’okuhwera abandi okubaasa kuheereza Ruhanga. Nibaija kushoma naiwe Baibuli omu ka yaawe, nibaija kukuhwera kwega oku waakubaasa kuramya Yehova omu muringo oguhikire. Kandi torikwetenga kubashashura ahabw’eki. Abajurizi ba Yehova nibashemerererwa okwegyesa abandi amazima ahabw’okuba nibakunda abantu na Yehova Ruhanga.

[Ekishushani ekiri aha rupapura 23]

Yesu, Omwana wa Ruhanga, akooreka abantu rukundo arikubatambira endwara zaabo

[Ekishushani ekiri aha rupapura 24]

Abaefeso bakootsya ebitabo byabo eby’obufumu

[Ekishushani ekiri aha rupapura 25]

Baho omu nteerane z’Abakristaayo.—Abaheburaayo 10:24, 25

[Ekishushani ekiri aha rupapura 25]

Yega Baibuli.—Yohaana 17:3

 [Ekishushani ekiri aha rupapura 26]

Buurira abandi.—Matayo 24:14

[Ekishushani ekiri aha rupapura 26]

Batizibwa.—Ebyakozirwe 2:41

[Ekishushani ekiri aha rupapura 26]

Shaba Yehova.—Abafilipi 4:6, 7

[Ebishushani ebiri aha rupapura 27]

Abajurizi ba Yehova nibaija kukuhwera obaase kuheereza Ruhanga