Ekibiina kyaitu tikirikwebemberwa abantu abarikushashurwa. Kwonka nk’oku kyabaire kiri obu ekibiina Ekikristaayo kyatandika, abareeberezi nibatooranwa kureeberera ekibiina kya Ruhanga. (Ebyakozirwe 20:28) Abareeberezi n’abashaija abarikuba baine omukago murungi na Yehova abarikwebembera kandi bakareeberera ekibiina ‘batagyemirwe kureka beeyendeire; ti habw’omururu gw’okutunga ebintu, kureka nibaba baine omutima ogurikukunda.’ (1 Petero 5:1-3) Nibakora ki ebirikutuhwera?

Nibatufaho kandi baturinda. Abareeberezi nibatuha obuhabuzi kuruga omu Byahandiikirwe kandi batuhwera kuguma haihi na Yehova. Ahabw’okumanya ngu Ruhanga niwe arikuba abahaire obujunaanizibwa bukuru obu, abareeberezi tibarikwetwara nk’abategyeki, kureka nibatuhwera kugira okushemererwa. (2 Abakorinso 1:24) Nk’oku omuriisa w’entaama arikufayo munonga aha buri emwe aha ntaama ze, n’abareeberezi nibateeraho kumanya gye buri omwe omu kibiina.​—Enfumu 27:23.

Nibatwegyesa oku twine kukora ebi Ruhanga akunda. Buri saabiiti abareeberezi nibeebembera enteerane z’ekibiina okutuhwera kuhamya okwikiriza kwaitu. (Ebyakozirwe 15:32) Kandi abashaija aba abeeziriki nibeebembera omurimo gw’okubuurira, babuurira naitwe, batutendeka n’omu miringo yoona ey’obuheereza.

Nibahwera buri omwe kuhamya omukago gwe na Yehova. Abareeberezi okubaasa kuhwera buri omwe kwongyera kugira omukago guhami na Yehova, nibatutaayaayira omuka nari bagaaniira naitwe turi aha Kyombeko ky’Obukama batugumya barikukoresa Ebyahandiikirwe.​—Yakobo 5:14, 15.

Oyihireho obujunaanizibwa obu abareeberezi baine omu kibiina, baingi aharibo nibakora kandi nibareeberera ab’omu maka gaabo. Ab’eishe-emwe aba abarikukora n’obweziriki twine kubaha ekitiinisa.​—1 Abatesalonika 5:12, 13.

• Abareeberezi baine bujunaanizibwa ki omu kibiina?

• Abareeberezi nibatufaho bata?