Okutwaza Amagara omu Muringo ogu Ruhanga Arikusiima
Eshuura ya Ikumi na Ibiri
Okutwaza Amagara omu Muringo ogu Ruhanga Arikusiima
Noobaasa kuhinduka ota munywani wa Ruhanga?
Okuhakanisa kwa Sitaane okw’obukuru bwa Ruhanga obw’okutegyeka nikukukwataho kuta?
Ni mitwarize ki ei Yehova arikwanga?
Ni mu miringo ki erikusiimwa Ruhanga ei orikubaasa kutwazamu amagara gaawe?
1, 2. Heereza bimwe aha by’okureeberaho eby’abantu abu Yehova yaayetsire banywani be ab’ahamara.
NI MUNTU wa muringo ki ou orikubaasa kutoorana kuba munywani waawe? Ningira ngu okaayenzire omunywani oine ebigyendererwa nk’ebyawe kandi orikwikirizana naiwe omu biteekateeko n’omu mitwarize. Noija kwirira haihi omunywani oine emitwarize mirungi nk’obwesigwa hamwe n’embabazi.
2 Okwiha iranaira n’okuhitsya eri izooba, Ruhanga atwire naatoorana abantu abeesigwa kuba banywani be ab’ahamara. Nk’eky’okureeberaho, Yehova akeeta Abrahamu munywani we. (Isaaya 41:8; Yakobo 2:23) Ruhanga akagamba ahari Daudi ‘nk’omuntu ori nk’omutima gwe oku gurikwenda’ ahabw’okuba akaba ari omuntu ou Yehova yaabaire naakunda. (Ebyakozirwe 13:22) Kandi Yehova akatwara omurangi Danieli nka “omuntu orikukundwa munonga.”—Danieli 9:23.
3. Ahabw’enki Yehova naatoorana abantu abamwe kuba banywani be?
3 Ahabw’enki Yehova yaatooraine Abrahamu, Daudi na Danieli kuba banywani be? Akagambira Abrahamu ati: “Oyorobeire eiraka ryangye.” (Okutandika 22:18) N’ahabw’ekyo, Yehova nairira haihi n’abo abarikukora ebi arikubenza omu bucureezi. Akagambira Abaisraeli ati: “Mworobere eiraka ryangye, naanye ndyaba Ruhanga waanyu, naimwe mube abantu bangye.” (Yeremia 7:23) Waayorobera Yehova, naiwe nooba munywani we!
YEHOVA NAAHA BANYWANI BE AMAANI
4, 5. Yehova naayoreka ata amaani ge okuhwera abantu be?
4 Teekateeka aha migisha erikuruga omu kuba munywani wa Ruhanga. Baibuli neegira ngu Yehova naasherura emiringo ‘y’okweyoreka ku ari ow’amaani kuhwera abaine emitima eshugaine ahariwe.’ (2 Obusingye 16:9) Yehova naabaasa ata kworeka amaani ge ahariiwe? Omuringo gumwe nigugambwaho omuri Zaaburi 32:8 ahu turi kushoma tuti: “Ndyakwegyesa, nkuhabure omuhanda ogu oritoora; ndyakuha obwengye, nkutaireho eriisho.”
5 Ka n’ebigambo birungi ebirikworeka okufayo kwa Yehova! Naija kukuha obuhabuzi oburikwetengwa kandi akurinde obwo orikubugyenderaho. Ruhanga naayenda akuhwere osingure okugyezibwa. (Zaaburi 55:22) N’ahabw’ekyo, waaheereza Yehova n’omutima gwawe gwona, noogira obwesigye nk’omuhandiiki wa zaaburi owaagizire ati: “MUKAMA niwe ntaho amaisho obutoosha; tinditengyetsibwa, ahakuba ari aha rubaju rwangye rwa buryo.” (Zaaburi 16:8; 63:8) Buzima, Yehova naabaasa kukuhwera ogire emitwarize erikumushemeza. Kwonka nk’oku orikumanya, hariho omuzigu wa Ruhanga orikwenda ngu akuzibire kukora ekyo.
OKUHAKANISA KWA SITAANE
6. Ni bintu ki ebitahikire ebi Sitaane yaagambire aha bantu?
6 Eshuura ya 11 ey’ekitabo eki neeshoborora oku Sitaane Omuregi yaahakaniise obutegyeki bwa Ruhanga. Sitaane akata orubanja ahari Ruhanga obwo arikubeiha ngu Yehova tarayorekire buringaniza omu kutareka Adamu na Haawa kwecweramu ekirungi n’ekibi. Bwanyima Adamu na Haawa bakashiisha kandi ensi ku yaatandikire kwijura abaana baabo, Sitaane yaabangaanisa aha kigyendererwa ky’abantu boona. Akagira ati: “Abantu tibarikuheereza Ruhanga ahabw’okumukunda. Nyikiriza oreebe yaaba ntaraahindure buri omwe akakurugaho!” Ebihandikirwe aha mushaija orikwetwa Yobu nibyoreka ngu ekyo nikyo Sitaane yaabaire naateekateeka. Yobu akaba ari oha, kandi akaija kweshanga ata omu kuhakanisa kwa Sitaane?
7, 8. (a) N’enki ekyareetaire Yobu kuba ow’omutaano aha bandi bantu ab’omu bwire obwo? (b) Sitaane akabangaanisa ata aha kigyendererwa kya Yobu?
7 Yobu akaba ariho emyaka nka 3,600 ehingwire. Akaba ari omushaija oine emitwarize mirungi, ahakuba kikareetera Yehova kugira ati: ‘Tihaine mushaija orikumushusha omu nsi, omushaija otaine kabara kandi ohikiriire, orikutiina Ruhanga kandi orikwetantara ekibi.’ (Yobu 1:8) Yobu akaba naasiimwa Ruhanga.
8 Sitaane akabangaanisa aha kigyendererwa kya Yobu eky’okuheereza Ruhanga. Omuregi akagambira Yehova ati: “Tiiwe omurinda [Yobu] embaju zoona, we n’enju ye n’ebi atungire byona? Okaha omugisha ebi yaakozire n’emikono ye, kandi waakanyisa ebi atungire byona. Kwonka hati gorora omukono gwawe, okore aha bintu bye byona; naija kukwehakana butunu.”—Yobu 1:10, 11.
9. Yehova akagarukamu ata okuhakanisa kwa Sitaane, kandi n’ahabw’enki?
9 Kandi Sitaane akagira ngu Yobu akaba naaheereza Ruhanga ahabw’ebirungi byonka ebi Ruhanga yaabaire naamuha. Omuregi kandi akagira ngu Yobu ku yaakugyezibwa, akaaruga ahari Ruhanga. Yehova akagarukamu ata okuhakanisa kwa Sitaane? Obu enshonga egi yaabaire neetwariramu ebigyendererwa bya Yobu, Yehova akareka Sitaane yaagyeza Yobu. Omu muringo ogu, rukundo ya Yobu ahari Ruhanga—nari okutagira rukundo ahariwe—kukaba nikwija kureebeka.
YOBU OKUGYEZIBWA
10. Yobu akahikwaho kugyezibwa kwa muringo ki, kandi akakutwaza ata?
10 Sitaane akarahuka yaagyeza Yobu omu miringo mingi. Gamwe aha matungo ga Yobu gakaibwa kandi agandi gaitwa. Abaheereza be abaingi bakaitwa. Eki kikamureetera oburemeezi omu by’entatsya. Akabi akandi kakabaho obu abaana ba Yobu ikumi baafeera omu ihunga. N’obu haraabe haabaireho ebintu bibi munonga ebi, “Yobu tarakozire kibi n’obu kwakuba okubarira Ruhanga okushobya.”—Yobu 1:22.
11. (a) Ni kubangaanisa ki okwakabiri oku Sitaane yaagizire ahari Yobu, kandi Yehova akagarukamu ata Sitaane? (b) Yobu akatwaza ata omu kurwara kwe okwamureetaire obusaasi bwingi?
11 Sitaane taragarukiire aho. Aine kuba yaateekateekire ngu n’obu Yobu yaabaasize kugumisiriza obu yaafeerwa ebintu bye, abaheereza be n’abaana be, akaba naija kwehakana Ruhanga kuri naarwara. Yehova akareka Sitaane kurwaza Yobu ebihuute, endwara mbi erikureeta obusaasi bwingi. Kwonka nabwe eki tikirareetaire Yobu kubura kugira okwikiriza omuri Ruhanga. Kureka, ahamire akagira ati: “Okuhitsya obu ndifa, tindireka kuguma ndi omwesigwa.”—Yobu 27:5.
12. Emitwarize ya Yobu ekahamya eta ngu okuhakanisa kw’Omuregi kukaba kutahikire?
12 Yobu akaba atarikumanya ngu Sitaane niwe yaabaire naamureetera oburemeezi. Ahabw’okutamanya ebigyendererwa by’Omuregi eby’okuhakanisa obukuru bwa Ruhanga bw’okutegyeka, Yobu akateekateeka ngu Ruhanga niwe yaabaire ari oburugo bw’oburemeezi bwe. (Yobu 6:4; 16:11-14) Kwonka nabwe, akaguma ari omwesigwa ahari Yehova. Kandi ekya Sitaane kugira ngu Yobu naaheereza Ruhanga ahabw’okutunga ebirungi kikareebwa butunu ku kyabaire kiri ekishuba ahabw’okuba Yobu akaguma ari omwesigwa!
13. N’enki ekyahikire ahari Yobu ahabw’okuba omwesigwa ahari Ruhanga?
13 Obwesigwa bwa Yobu bukaheereza Yehova oh’okwihirira kugarukamu okuhakanisa kwa Sitaane. Yobu buzima akaba ari munywani wa Yehova, kandi Ruhanga akamuha ebihembo ahabw’omuhanda gwe ogw’obwesigwa.—Yobu 42:12-17.
OKU EKI KIRIKUKUKWATAHO
14, 15. Ahabw’enki nitubaasa kugira ngu okuhakanisa kwa Sitaane ahari Yobu nikukwata aha bantu boona?
14 Enshonga erikukwata aha bwesigwa ahari Ruhanga eyaareetsirweho Sitaane ekaba etarikukwata ahari Yobu wenka. Naiwe neekukwataho. Eki nikyorekwa gye omu Enfumu 27:11, ahu Ekigambo kya Yehova kirikugira kiti: “Mwana wangye, gira obwengye oshemeze omutima gwangye, mbone kugarukamu ogwo otuura nanjuma.” Ebigambo ebi, ebyahandiikirwe emyaka mingi bwanyima y’okufa kwa Yobu, nibyoreka ngu Sitaane akaba naakijuma Ruhanga kandi naakihakanisa abaheereza Be. Ku turikutuura omu muringo ogu Yehova arikusiima, buzima nituhwera omu kugarukamu ebishuba bya Sitaane, kandi omu muringo ogwo nitushemeza omutima gwa Ruhanga. Iwe ekyo nookireeba ota? T’omugisha gw’omutaano okugira omwanya omu kugarukamu ekishuba ky’Omuregi, n’obu kyakukwetengyesa okukora empindahinduka omu magara gaawe?
15 Ijuka ngu Sitaane akagira ati: ‘Ebi omuntu atungire byona, akaabihayo ahabw’amagara ge.’ (Yobu 2:4) Omu kugira ngu “omuntu,” Sitaane akakyoreka gye ngu eki yaahakaineho kikaba kitarikukwata ahari Yobu wenka kureka n’aha bantu boona. Egi n’enshonga nkuru munonga. Sitaane areetsireho okubangaanisa aha bwesigwa bwawe ahari Ruhanga. Omu bwire bw’oburemeezi, Omuregi naaba naayenda kukureeba nooruga ahari Ruhanga n’omu muhanda gwe ogw’okuhikiirira. Sitaane naagyezaho ata kureeba ngu eki yaakihikiiriza?
16. (a) Ni miringo ki ei Sitaane arikwejunisa okugyezaho kwiha abantu ahari Ruhanga? (b) Omuregi naabaasa kwejunisa ata emihanda egi ahariiwe?
16 Nk’oku kigambirweho omu Shuura ya 10, Sitaane naayejunisa emiringo mingi okugyezaho kwiha abantu ahari Ruhanga. Obumwe, naashoba “nk’entare erikutsinda, naasherura ou araarye.” (1 Petero 5:8) N’ahabw’ekyo, okuhaririza kwa Sitaane nikubaasa kureebeka banywani baawe, abanyabuzaare nari abandi baagyezaho kukumaramu amaani ngu otakaayega Baibuli kandi okagyendera aha bi orikwega. * (Yohaana 15:19, 20) Obundi, Sitaane ‘naaguma naayehindura nka maraika w’omushana.’ (2 Abakorinso 11:14) Omuregi naabaasa kwejunisa oburingaringo kukubeihabeiha ngu orugye omu muhanda gw’okutiina Ruhanga. Kandi naabaasa kwejunisa ebirikutumaramu amaani, obundi atureetere kwehurira nk’abatarikubaasa kukora ebi Ruhanga arikusiima. (Enfumu 24:10) Yaaba Sitaane ashooba “nk’entare erikutsinda” nari akeereebekyesa “nka maraika w’omushana,” okuhakanisa kwe nikuguma kurikushushana: Naagira ngu waahikwaho okugyezibwa nari ebyosyo, ngu noija kurekyera aho kuheereza Ruhanga. Noobaasa ota kugarukamu okuhakanisa kwa Sitaane kandi okooreka obwesigwa bwawe ahari Ruhanga, nk’oku Yobu yaakozire?
OKWOROBERA EBIRAGIRO BYA YEHOVA
17. Ni nshonga ki enkuru eshemereire kutureetera kworobera ebiragiro bya Yehova?
17 Noobaasa kugarukamu okuhakanisa kwa Sitaane orikutwaza amagara gaawe omu muringo ogurikushemeza Ruhanga. Eki nikitwariramu ki? Baibuli negarukamu eti: “Okunde MUKAMA Ruhanga waawe n’omutima gwawe gwona, n’amagara gaawe goona n’amaani gaawe goona.” (Eky’Ebiragiro 6:5) Rukundo yaawe ahari Ruhanga ku eraagyende neeyeyongyera, noija kugira ekyetengo ky’okukora ebi arikukwenza. Yohaana entumwa akahandika ati: “Ahakuba oku nikwo kukunda Ruhanga, itwe okworobera ebiragiro bye.” Waaba nookunda Yehova n’omutima gwawe gwona, noija kushanga ngu “ebiragiro bye tibirusya.”—1 Yohaana 5:3.
18, 19. (a) Ebiragiro bya Yehova ebimwe ni biiha? (Reeba akashanduuko aha rupapura 122.) (b) Nitumanya tuta ngu Ruhanga tarikutwenza ebi tutarikubaasa?
18 Ebiragiro bya Yehova ni biiha? Bimwe aharibyo nibikwata aha mitwarize ei tushemereire kwetantara. Nk’eky’okureeberaho, yetegyereze akashanduuko aha rupapura 122, akaine omutwe “Yetantare Ebi Yehova Ayanga.” Omuriko, noija kushanga hahandikirwemu emitwarize ei Baibuli buzima erikukyeena. Omukubanza, ebikorwa ebimwe ebyorekirwe nibibaasa kureebeka nk’ebitari bibi. Kwonka bwanyima y’okwecumitiriza aha byahandiikirwe ebyorekirwe, noija kureeba obwengye oburi omu biragiro bya Yehova. Okukora empindahinduka omu mitwarize yaawe nikibaasa kukugumira munonga. Kwonka okutwaza amagara gaawe omu muringo ogu Ruhanga arikusiima nikireeta okumarwa hamwe n’okushemererwa. (Isaaya 48:17, 18) Kandi n’ekintu eki orikubaasa kukora. Ekyo nitukimanya tuta?
19 Yehova tarikubaasa kutwenza ebi tutarikubaasa. (Eky’Ebiragiro 30:11-14) Naamanya obuhangwa bwaitu hamwe n’obweremwa bwaitu okukira oku itwe turikwemanya. (Zaaburi 103:14) Kandi hoona, Yehova naatuha amaani g’okumworobera. Entumwa Paulo akahandika ati: “Ruhanga n’ow’okwesigwa; taribaikiriza kugyezibwa ekigyezo eki mutarikubaasa; kureka omu kigyezo ekyo aryabateeraho oburyo bw’okuhunga ngu mubaase kukigumisiririza.” (1 Abakorinso 10:13) Okukuhwera kugumisiriza, Yehova naabaasa n’okukuha ‘amaani agarikukirirayo kimwe.’ (2 Abakorinso 4:7) Bwanyima y’okugumisiriza ebigyezo bingi, Paulo akabaasa kugira ati: “Nimbaasa kukora byona omuri Kristo ompa amaani.”—Abafilipi 4:13.
OKUTUNGUURA EMITWARIZE EI RUHANGA ARIKUSIIMA
20. Ni mitwarize ki erimu okutiina Ruhanga ei tushemereire kutunguura, kandi ahabw’enki emitwarize egi eri mikuru?
20 Okushemeza Yehova tikirikumanyisa okwetantara ebi ayanga kwonka. Kandi oine kukunda ebi arikukunda. (Abarooma 12:9) Torikuhurira nooyenda kwirira haihi n’abo abaine ebigyendererwa, emitwarize n’ebiteekateeko nk’ebyawe? Nikwo na Yehova arikuhurira atyo. N’ahabw’ekyo, yega kukunda ebintu ebi Yehova arikukunda. Bimwe ahari ebi nibigambwaho omuri Zaaburi 15:1-5, ahu turikushoma ahari abo abu Ruhanga arikutwara nka banywani be. Banywani ba Yehova nibooreka eki Baibuli erikweta “ebyana by’[o]mwoyo.” Nibitwariramu emitwarize nka, “okukunda, okushemererwa, obusingye, okugumisiriza, embabazi, oburungi, obwesigwa, obucureezi n’okwerinda.”—Abagalatia 5:22, 23.
21. N’enki ekiriije kukuhwera kutunguura emitwarize erimu okutiina Ruhanga?
21 Okushoma hamwe n’okwega Baibuli obutoosha nikwija kukuhwera kutunguura emitwarize erimu okutiina Ruhanga. Kandi okwega, okamanya ebi Ruhanga akunda nikwija kukuhwera okuhikaanisa ebiteekateeko byawe hamwe n’ebye. (Isaaya 30:20, 21) Oku oraayeyongyere kuhamya okukunda kwawe ahari Yehova, nikwo n’ekyetengo kyawe eky’okutwaza amagara gaawe omu muringo ogu Ruhanga arikusiima kiraayeyongyere.
22. Noija kuhikiiriza ki ku oraatwaze amagara gaawe omu muringo ogurikushemeza Ruhanga?
22 Nikyetengyesa okutaho omutima okubaasa kutwaza amagara gaawe omu muringo ogurikushemeza Yehova. Baibuli neeshushanisa okuhindura aha mitwarize y’amagara gaawe nk’okujuura omuntu owaira reero okajwara omuntu omusya. (Abakolosai 3:9, 10) Kwonka aha bikwatiraine n’ebiragiro bya Yehova, omuhandiiki wa Zaaburi akahandiika ati: “Omu kubyorobera harimu ebihembo bingi.” (Zaaburi 19:11) Naiwe wenka noija kushanga ngu okutwaza amagara gaawe omu muringo ogu Ruhanga arikusiima nikireeta emigisha mingi. Waakora otyo, noija kugarukamu okuhakanisa kwa Sitaane kandi oshemeze omutima gwa Yehova!
[Obugambo obw’Ahansi]
^ kacw. 16 Eki tikirikumanyisa ngu buri omwe orikukuhakanisa, ahabwe naaba naayebemberwa Sitaane. Kwonka nabwe Sitaane niwe mutegyeki w’ensi egi, kandi ensi yoona eri omu bushoboorozi bwe. (2 Abakorinso 4:4; 1 Yohaana 5:19) N’ahabw’ekyo tushemereire kumanya ngu okugyendera omu muhanda gw’okutiina Ruhanga nikiija kureebwa nk’ekitari kya buriijo, kandi abamwe nibaija kukuhakanisa.
EBI BAIBULI ERIKWEGYESA
▪ Noobaasa kuba munywani wa Ruhanga orikworobera ebirangiro bye.—Yakobo 2:23.
▪ Sitaane akahakanisa obwesigwa bw’abantu boona.—Yobu 1:8, 10, 11; 2:4; Enfumu 27:11.
▪ Tushemereire kureka ebikorwa ebi Ruhanga arikwanga.—1 Abakorinso 6:9, 10.
▪ Nitubaasa kushemeza Yehova twayanga ebi arikwanga, tukakunda ebi arikukunda.—Abarooma 12:9.
[Ebibuuzo by’Obucweka]
[Akabokisi/Ekishushani ekiri aha rupapura 122, 123]
YETANTARE EBI YEHOVA AYANGA
Okwita.—Okuruga 20:13; 21:22, 23.
Obushambani.—Abaleevi 20:10, 13, 15, 16; Abarooma 1:24, 26, 27, 32; 1 Abakorinso 6:9, 10.
Eby’Obufumu.—Eky’Ebiragiro 18:9-13; 1 Abakorinso 10:21, 22; Abagalatia 5:20, 21.
Okuramya ebishushani.—1 Abakorinso 10:14.
Obusinzi.—1 Abakorinso 5:11.
Okwiba.—Abaleevi 6:2, 4; Abaefeso 4:28.
Okubeiha.—Enfumu 6:16, 19; Abakolosai 3:9; Okushuuruurwa 22:15.
Omururu.—1 Abakorinso 5:11.
Obushaarizi.—Zaaburi 11:5; Enfumu 22:24, 25; Malaki 2:16; Abagalatia 5:20.
Emigambire etashemeire.—Abaleevi 19:16; Abaefeso 5:4; Abakolosai 3:8.
Okukoresa kubi eshagama.—Okutandika 9:4; Ebyakozirwe 15:20, 28, 29.
Okwanga kureeberera ab’omuka yaawe.—1 Timoseo 5:8.
Okwejumba omu ntaro nari omu ntongane z’ensi egi ez’eby’obutegyeki.—Isaaya 2:4; Yohaana 6:15; 17:16.
Okukoresa etaabe nari enjaayi.—Mako 15:23; 2 Abakorinso 7:1.
[Ekishushani ekiri aha rupapura 118]
Yobu akaheebwa ebihembo ahabw’okuguma ari omwesigwa
