Yirira Haihi Ruhanga omu Kushaba
Eshuura ya Ikumi na Mushanju
Yirira Haihi Ruhanga omu Kushaba
Ahabw’enki tushemereire kushaba Ruhanga?
Ruhanga okubaasa kuhurira okushaba kwaitu, n’enki eki tushemereire kukora?
Ruhanga naagarukamu ata okushaba kwaitu?
1, 2. Ahabw’enki tushemereire kutwara okushaba nk’omugisha gw’omutaano, kandi ahabw’enki tushemereire kumanya eki Baibuli erikwegyesa aha kushaba?
WAAGIGYERAGYERANISA n’ebihangirwe ebindi ebihango, ensi egi etuurwamu ni nkye munonga. Ahari Yehova, “Owaahangire eiguru n’ensi,” amahanga ni nk’eitondo ry’amaizi omu ndobo. (Zaaburi 115:15; Isaaya 40:15) N’obu kiraabe kiri kityo, Baibuli neegira eti: “MUKAMA ari haihi na boona abarikumutakira, boona abamutakira omu mazima. Abarikumutiina aryabamarira ebi barikwetenga, kandi aryahurira okutaka kwabo, abajune.” (Zaaburi 145:18, 19) Teekateeka eki eki kirikumanyisa! Omuhangi ow’obushoboorozi bwona aturi haihi kandi naatuhurira ‘ku turikumutakira omu mazima.’ Mbwenu buzima ka twine omugisha gw’omutaano okwirira haihi Ruhanga omu kushaba!
2 Kwonka ku turaabe nitwenda ngu Yehova ahurire okushaba kwaitu, tushemereire kumushaba omu muringo ogu arikusiima. Eki mbwenu tukaabaasa kukikora tuta twaba tutarikumanya eki Baibuli erikwegyesa aha kushaba? Nikikuru itwe okumanya eki Ebyahandiikirwe birikugamba ahari eki, ahakuba okushaba nikutuhwera okugira omukago guhamire na Yehova.
AHABW’ENKI TUSHEMEREIRE KUSHABA YEHOVA?
3. Ni nshonga eki enkuru eshemereire kutureetera kushaba Yehova?
3 Enshonga emwe enkuru ahabw’enki tushemereire kushaba Yehova n’ahabw’okuba naatweta okumwirira haihi. Ekigambo kye nikituhiga kiti: “Muteemereza omutima aha kintu kyona, kureka omuri byona mumanyise Ruhanga ebi murikwetenga omu kushaba n’okweshengyereza, kandi musiime. Kandi obusingye bwa Ruhanga oburengire okwetegyereza kw’omuntu weena, buryaguma burinde emitima yaanyu n’obwengye bwanyu omuri Kristo Yesu.” (Abafilipi 4:6, 7) Buzimazima titurikwenda kwehuzya omugisha nk’ogwo ogu Omutegyeki Orikukirayo omu nsi yoona atuhaire!
4. Okushaba Yehova obutoosha nikuhamya kuta omukago gwaitu nawe?
4 Enshonga endiijo ahabw’enki tushemereire kushaba n’ahabw’okuba okushaba Yehova obutoosha n’omuhanda gw’okuhamyamu omukago gwaitu nawe. Abanywani aba buzima tibarikugamba hamwe obu barikuba nibenda ekintu bwonka. Kureka, abanywani abarungi buri omwe naafayo ahari mugyenzi we, kandi omukago gwabo nigweyongyera kuhama baaguma nibahikaanisa ebiteekateeko hamwe n’ebyetengo byabo. Omu muringo nk’ogwo, eki haine oku kiine akakwate n’omukago gwaitu na Yehova Ruhanga. Orikuhwerwa ekitabo eki, oyegire bingi ebi Baibuli erikwegyesa ebirikukwata ahari Yehova, emitwarize ye hamwe n’ebigyendererwa bye kandi omumanyire nk’omuntu owa buzima. Okushaba nikukuha omugisha gw’okugambira Sho ow’omu iguru ebiteekateeko byawe n’ebikuri aha mutima. Omu kukora eki, noohamya omukago gwawe na Yehova.—Yakobo 4:8.
NI BINTU KI EBIRIKWETENGWA EBI TUSHEMEREIRE KUHIKIIRIZA?
5. N’enki ekirikworeka ngu Yehova tarikuhurira eshaara zoona?
5 Yehova naahurira eshaara zoona? Teekateeka aha bi yaagambiire Abaisraeli abagomi omu biro by’omurangi Isaaya: “Ku muritega emikono yaanyu, ndyabaima amaisho; nangwa n’obu muriguma nimushaba hakye-hakye, tindibahurira; ahabw’okuba engaro zaanyu ziijwire eshagama.” (Isaaya 1:15) N’ahabw’ekyo, ebikorwa ebimwe nibituma Ruhanga ataahurira okushaba kwaitu. N’ahabw’ekyo, Ruhanga okubaasa kuhurira okushaba kwaitu, twine kuhikiiriza ebintu ebikuru ebirikwetengwa.
6. Ruhanga okubaasa kuhurira eshaara zeitu, ni kintu ki ekikuru ekirikwetengyesa, kandi nitubaasa kukihikiiriza tuta?
6 Enshonga enkuru n’egi: Tushemereire kworeka okwikiriza. (Mako 11:24) Entumwa Paulo akahandiika ati: “Kandi otarikwikiriza tarikubaasa kumushemeza [Ruhanga]; ahakuba omuntu weena orikwija ahari Ruhanga, ashemereire kwikiriza ku ariho, kandi ku aha ebihembo abamusherura.” (Abaheburaayo 11:6) Okugira okwikiriza okwa buzima nikikira aha kumanya kwonka ngu Ruhanga ariho kandi ngu naahurira kandi agarukamu eshaara. Okwikiriza nikuhamibwa ebikorwa. Nituragiirwa kukyoreka gye ngu twine okwikiriza omu muringo gu turikutwazamu amagara gaitu buri izooba.—Yakobo 2:26.
7. (a) Ahabw’enki tushemereire kuba abacureezi twaba nitugamba na Yehova omu kushaba? (b) Twaba nitushaba Ruhanga, nitubaasa kworeka tuta obucureezi n’omutima ogugororokire?
7 Ekindi, Yehova naayenda ngu abo abarikumushaba bamushabe baine obucureezi n’emitima egororokire. Mbwenu buzima titushemereire kuba abacureezi twaba nitugamba na Yehova? Abantu ku barikutunga omugisha gw’okugamba n’Omugabe nari omwebembezi w’eihanga, obutoosha nibagamba nawe omu muringo gw’ekitiinisa barikumanya ngu aine omwanya mukuru omu butegyeki. Naitwe buzima tushemereire kugamba omu muringo gw’ekitiinisa twaba nitushaba Yehova! (Zaaburi 138:6) Manya ni “Ruhanga ow’Obushoboorozi bwona!” (Okutandika 17:1) Twaba nitushaba Ruhanga, omuringo gu turikugambamu gushemereire kworeka obucureezi, turikumanya ku nimukuru. Obucureezi nk’obwo nibwija kutureetera kushaba twihire aha mutima, turikwetantara okugarukagaruka omu bigambo.—Matayo 6:7, 8.
8. Nitubaasa kukorera tuta aha bi turikushaba?
8 Ekindi ekirikwetengyesa okubaasa kuhurirwa Ruhanga n’okukorera ahari ekyo eki turikushaba. Yehova atwinemu amatsiko okukora kyona eki turikubaasa okukorerera ekyo eki turikushaba. Nk’eky’okureeberaho, twashaba ngu “otuhe hati eby’okurya ebi otuha obutoosha,” tushemereire kukora n’amaani omurimo gwona ogu turaabone. (Matayo 6:11; 2 Abatesalonika 3:10) Twashaba obuhwezi okusingura obweremwa bw’omubiri, tushemereire kwetantara embeera ezirikubaasa kututwara omu kwohibwa. (Abakolosai 3:5) Okwongyera aha bintu ebi ebikuru ebirikwetengwa, hariho ebibuuzo ebirikukwata aha kushaba ebi turikwetenga kugarukwamu.
OKUGARUKAMU EBIBUUZO EBIMWE EBIRIKUKWATA AHA KUSHABA
9. N’oha ou tushemereire kushaba kandi kurabira omuri oha?
9 N’oha ou tushemereire kushaba? Yesu akeegyesa abeegi be kushaba “Tataitwe ow’omu iguru.” (Matayo 6:9) N’ahabw’ekyo, okushaba kwaitu kushemereire kworekyera Yehova Ruhanga. Kwonka, Yehova naayenda ngu tumanye omwanya gwa Yesu Kristo, Omwana we omwe nyamunegyere. Nk’oku twayegire omu Shuura ya 5, Yesu akooherezibwa omu nsi okuba ekitambo kutujuna kuruga omu kibi n’okufa. (Yohaana 3:16; Abarooma 5:12) Niwe Munyamurwa Omukuru kandi Omucwi w’Emanja. (Yohaana 5:22; Abaheburaayo 6:20) N’ahabw’ekyo, Ebyahandiikirwe nibituragiira kushaba turikurabira omuri Yesu. Yesu we wenka akagira ati: “Niinye muhanda, n’amazima, n’amagara; tihariho oija ahari Isheboona, atarabire muriinye.” (Yohaana 14:6) Okushaba kwaitu okubaasa kuhurirwa, nituragiirwa kushaba Yehova wenka turikurabira omu Mwana we.
10. Ahabw’enki kitarikwetengyesa okugira omuringo gu twakoramu omubiri gwaitu twaba nitushaba?
10 Nikitwetengyesa shi okugira oku twayemereramu nari okutsimba amaju twaba nitushaba? Ngaaha. Yehova tarikutwetengyesa kugira omuringo ogu twakoramu emikono nari omubiri gwaitu gwona. Baibuli neeyegyesa ngu nikiikirizibwa okushaba turi omu miringo etari emwe. Noobaasa kushaba oshutami, oyinami, otsimbire amaju nari oyemereire. (1 Obusingye 17:16; Nehemia 8:6; Danieli 6:10; Mako 11:25) Ekikuru buzima, ti muringo gu orikuba orimu ogurikubaasa kureebwa abantu, kureka ekikuru n’okuba n’omutima ogugororokire. Yaaba turi aha mirimo yaitu eya butoosha nari yaaba twayorekyera oburemeezi kitaraariire, nitubaasa kushaba tuhunami ahu turaabe turi hoona. Yehova naahurira okushaba nk’okwo n’obu abantu abandi baakuba batarikukimanya.—Nehemia 2:1-6.
11. Ni bintu ki ebimwe ebirikutukwataho ebi tushemereire kushaba omu shaara zeitu?
11 N’enki eki tushemereire kushaba? Baibuli neeshoborora eti: “Kandi obu nibwo bumanzi obu twine omuriwe, ngu ku tushaba ekintu kyona nk’oku akunda, [Yehova] atuhurira.” (1 Yohaana 5:14) N’ahabw’ekyo nitubaasa kushaba aha kintu kyona ekirikuhikaana n’ebi Ruhanga akunda. Ruhanga shi naakunda ngu tushabe aha bintu ebyaitu ahabwaitu? Eego buzima! Okushaba Yehova kiri nk’oku waakuba noogaaniira na munywani waawe ow’ahamara. Nitubaasa kugamba tutarikutiina, ‘tumugambire byona, tumare aha kashansha.’ (Zaaburi 62:8) Kihikire itwe okushaba kuheebwa omwoyo orikwera, ahakuba nigutuhwera kukora ebihikire. (Luka 11:13) Nitubaasa kandi n’okushaba oburagirizi okubaasa kucwamu kurungi hamwe n’amaani g’okwemera oburemeezi. (Yakobo 1:5) Twashiisha, tushemereire kushaba okusaasirwa turikwihirira aha kitambo kya Kristo. (Abaefeso 1:3, 7) N’eky’amazima ebintu ebirikutukwataho tibyo byonka ebi tushemereire kugambaho omu kushaba kwaitu. Titushemereire kweshabira itwe twenka, kureka tushemereire kushabira n’abandi bantu—abanyabuzaare hamwe n’abaramya bataahi baitu.—Ebyakozirwe 12:5; Abakolosai 4:12.
12. Nitubaasa kworeka tuta ngu nitwebembeza ebirikukwata ahari Tataitwe ow’omu iguru omu kushaba kwaitu?
12 Ebintu ebirikukwata ahari Yehova Ruhanga nibyo bishemereire kuba eby’okubanza omu kushaba kwaitu. Buzima tushemereire kworeka okusiima okurugire aha mutima kandi tukamuhimbisa ahabw’oburungi bwe. (1 Obusingye 29:10-13) Yesu akataho eky’okureeberaho ky’eshaara ehandiikirwe omuri Matayo 6:9-13, omu yaatwegyeise kushaba ngu eiziina rya Ruhanga ryezibwe. Ekirikugira ngu Obukama bwa Ruhanga bwije kandi ngu ebi akunda bikorwe omu nsi nk’oku bikorwa omu iguru nikyo kirikukurataho. Ku yaaherize kugamba aha bintu ebi ebikuru ebirikukwata ahari Yehova, nibwo Yesu yaagambire aha byetengo byaitu. Naitwe ku turikwebembeza Ruhanga omu kushaba kwaitu, nitworeka ngu titurikufa aha byaitu byonka, kureka ngu nawe nitumufaho.
13. Ebyahandiikirwe nibigamba ki aha buraingwa bw’eshaara ezirikuhurirwa?
13 Oburaingwa bw’eshaara zeitu bushemereire kwingana ki? Baibuli terikworeka oku oburaingwa bw’eshaara zeitu ez’omu mubonano n’ezi turikushabira omu bantu kushemereire kuba. Nizibaasa kuba ngufu waaba nooshaba orikuza kurya nari kuba ndaingwa waaba noogambira Yehova ebikuri aha mutima. (1 Samueli 1:12, 15) Kwonka beitu, Yesu akateisa abantu abaabaire barandagatana omu kushaba kwabo ngu bareebwe. (Luka 20:46, 47) Eshaara nk’ezo tizirikushemeza Yehova. Ekikuru n’okushaba twihire aha mutima. N’ahabw’ekyo, oburaingwa bw’eshaara ezirikuhurirwa nikubaasa kurugiirira aha byetengo nari embeera eriho.
14. Baibuli neemanyisa ki ku erikutuhiga ‘okuguma nitushaba’ kandi eki nikituhuumuriza kita?
14 Tushemereire kushaba emirundi engahi? Baibuli neetuhiga ‘okuguma nitushaba,’ ‘okuguma nitushaba tuhamire’ kandi ‘okushaba obutoosha.’ (Matayo 26:41; Abarooma 12:12; 1 Abatesalonika 5:17) N’eky’amazima, ebigambo ebi tibirikumanyisa ngu tushemereire kuguma nitushaba Yehova buri kadakiika omu izooba. Kureka aha, Baibuli neetuhiga okushaba obutoosha, turikusiima Yehova obutoosha ahabw’oburungi bwe ahariitwe kandi turikushaba oburagirizi, obuhuumure n’okutugumya. Tikirikuhuumuriza okumanya ngu Yehova tarikututeeraho ah’okugarukira hamwe n’obwire obu tushemereire kugambiramu nawe omu kushaba? Buzima twaba nitusiima omugisha gw’okushaba, emirundi mingi nitwija kugamba na Tataitwe ow’omu iguru omu kushaba.
15. Ahabw’enki tushemereire kugira ngu “Amiina” aha muheru gw’eshaara ezi turikushaba omu mubonano nari eza boona?
15 Ahabw’enki tushemereire kugira ngu “Amiina” aha muheru gw’eshaara? Ekigambo “amiina” nikimanyisa “eego buzima,” nari shi “kibe nikwo kyaba.” Eby’okureeberaho by’omu Byahandiikirwe nibyoreka ngu kihikire okugira ngu “Amiina” aha muheru gw’eshaara ey’omu mubonano n’eya boona. (1 Obusingye 16:36; Zaaburi 41:13) Ku turikushaba, reero aha muheru tukagira ngu “Amiina,” nituhamya ngu ebi twagamba byaruga aha mutima. Ku turikugira ngu “Amiina”—ahanyima y’oku shaba kw’omuntu—yaaba tuhunami nari omu iraka eriri kuhurirwa, nitworeka ngu nitwikirizana n’ebyagambwa omu shaara.—1 Abakorinso 14:16.
OKU RUHANGA ARIKUGARUKAMU ESHAARA
16. Ni bwesigye ki obu twine aha bikwatiraine n’okushaba?
16 Kwonka shi buzima Ruhanga naagarukamu eshaara? Eego, buzima! Twine ahu turikwihirira okuhamya ngu “ohurira okushaba” naagarukamu eshaara z’obukaikuru n’obukaikuru bw’abantu ezirugire aha mutima. (Zaaburi 65:2) Yehova naabaasa kugarukamu okushaba kwaitu omu miringo mingi.
17. Ahabw’enki kirikubaasa kugambwa ngu Ruhanga naakoresa baamaraika be n’abaheereza be ab’omu nsi okugarukamu okushaba kwaitu?
17 Yehova naayejunisa baamaraika hamwe n’abaheereza be ab’omu nsi okugarukamu eshaara. (Abaheburaayo 1:13, 14) Hariho eby’okureeberaho ebyabaireho ebya bamwe abaashabire Ruhanga obuhwezi okwetegyereza Baibuli kandi handihakye bakahikwaho omwe aha baheereza ba Yehova. Eby’okureeberaho nk’ebyo nibihamya ngu baamaraika nibeebembera omurimo gw’okubuurira Obukama. (Okushuuruurwa 14:6) Okubaasa kugarukamu eshaara ezi turikushaba omu bwire obu turikuba nitwetenga obuhwezi, Yehova naabaasa kuhiga Omukristaayo okwija kutuhwera.—Enfumu 12:25; Yakobo 2:16.
18. Yehova naakoresa ata omwoyo we orikwera nari Ekigambo kye okugarukamu eshaara z’abaheereza be?
18 Yehova Ruhanga kandi naakoresa omwoyo we orikwera hamwe na Baibuli, Ekigambo kye, okugarukamu okushaba kw’abaheereza be. Naabaasa kugarukamu eshaara ezitushabire kutunga obuhwezi omu kwemera oburemeezi arikutuha oburagirizi n’amaani obwo arikukoresa omwoyo we orikwera. (2 Abakorinso 4:7) Obutoosha eky’okugarukamu eshaara ezi tushabire kuheebwa oburagirizi nikiruga omuri Baibuli, omu Yehova arikutuheera obuhwezi omu kucwamu kurungi. Omu kweshomesa Baibuli nari omu kushoma ebitabo by’Ekikristaayo nk’eki eki oriyo nooshoma, nitubaasa kugwa aha byahandiikirwe ebirikubaasa kutuhwera. Eby’omu Byahandiikirwe ebi turikwetenga nibibaasa kugambwaho omu nteerane z’Ekikristaayo nari nibibaasa kugambwa omureeberezi omu kibiina orikufayo aha burungi bwaitu.—Abagalatia 6:1.
19. N’enki eki tushemereire kuguma nitwijuka obumwe eshaara zeitu zaareebeka nk’ezitagarukirwemu?
19 Yehova yaareebeka nk’owakyerererwa kugarukamu eshaara zaitu, eki nikiba kitarikumanyisa ngu tarikubaasa kuzigarukamu. Kureka, tushemereire kwijuka ngu Yehova naagarukamu okushaba kurugiirira aha kigyendererwa kye n’aha bwire bwe obu ataireho. Naamanya gye ebyetengo byaitu n’oku arikubaasa kubihikiiriza okukira oku itwe turikubaasa kubihikiiriza. Obutoosha naatureka ‘okuguma nitushaba, nitusherura kandi turikwiguza.’ (Luka 11:5-10) Okuguma nitushaba nikworeka Ruhanga ngu buzima twine ekyetengo kandi ngu okwikiriza kwaitu n’okwa buzima. Kandi ekindi, Yehova naabaasa kugarukamu eshaara zeitu omu muringo ogu tutarikuteekateeka. Nk’eky’okureeberaho, naabaasa kugarukamu okushaba kwaitu aha bikwatiraine n’ekigyezo, atarikukiihaho, kureka arikutuheereza amaani g’okukigumisiririza.—Abafilipi 4:13.
20. Ahabw’enki tushemereire kukoresa omugisha gw’omutaano ogw’okushaba?
20 Ka twine okushemererwa okureeba ngu Omuhangi w’ebyahangirwe byona ari haihi na boona abarikumutakira kurabira omu kushaba nk’oku kishemereire! (Zaaburi 145:18) Obutoosha, ka tukorese omugisha ogw’okushaba Yehova obu guri omugisha gw’omutaano ahariitwe. Ku turaakore tutyo, obutoosha nitwija kugira omugisha gw’okwirira haihi Yehova, Ohurira okushaba.
EBI BAIBULI ERIKWEGYESA
▪ Okushaba Yehova obutoosha nikituhwera okugira omukago guhamire nawe.—Yakobo 4:8.
▪ Ruhanga okubaasa kuhurira okushaba kwaitu, tushemereire kushaba twine okwikiriza n’obucureezi kandi twihire aha mutima.—Mako 11:24.
▪ Tushemereire kushaba Yehova wenka kurabira omu Mwana we.—Matayo 6:9; Yohaana 14:6.
▪ Yehova, “Ohurira okushaba” naayejunisa baamaraika be, abaheereza be, omwoyo we hamwe n’Ekigambo kye okugarukamu eshaara.—Zaaburi 65:2.
[Ebibuuzo by’Obucweka]
[Ekishushani ekiri aha rupapura 165]
“Owaahangire eiguru n’ensi” ayeteekateekire kuhurira okushaba kwaitu
[Ekishushani ekiri aha rupapura 171]
Okushaba kwawe nikubaasa kuhurirwa obwire bwona
[Ekishushani ekiri aha rupapura 172, 173]
Omu kugarukamu okushaba kwaitu, Yehova naabaasa kuhiga Omukristaayo okwija kutuhwera
